किसान मन के नाव ले फर्जी करजा निकाल के भाग गए रहिस
बिलासपुर, सरकंडा के छै किसान मन के नाम म 50 लाख के लोन निकलके फरार हो गए बैंक मैनेजर ल दू साल बाद पुलिस ह ओडिशा ले गिरफ्तार करे हे। ओखर संगी ल पुलिस ह पहिलीच पकड़ ले रहिस। सरकंडा थाना प्रभारी परिवेश तिवारी के बताती ओडिशा के अंगुल निवासी प्रबोध कुमार दास 2016 म एक्सिस बैंक राजकिशोर नगर ब्रांच म डिप्टी मैनेजर रहिस। ये बेरा म ओ ह हिर्री क्षेत्र के धौंराभाठा निवासी हीरालाल साहू के संग मिलके छै किसान मन के नाम म अलग-अलग करके 50 लाख रुपए के लोन निकलवा लीस। एखर जानकारी किसान मन ल नइ रहिस। लोन के किस्त जमा नइ होए म बैंक कोति ले किसान मन ल चिट्ठी भेजे गीस। धोखाधड़ी के जानकारी होए म किसान मन ह सरकंडा थाना म शिकायत करिन। मामला खुले के बाद बैंक मैनेजर फरार हो गे। उहें, पुलिस ह ओखर संगी हीरालाल ल गिरफ्तार कर लीस। बाद म 2019 म दू अऊ किसान मन बैंक मैनेजर के खिलाफ शिकायत करिन। ये म पुलिस जुर्म दर्ज करके फरार बैंक मैनेजर के तलाश करत रहिस। जांच के बेरा म पता चलिस कि आरोपित ओडिशा म रहिके निजी बैंक म नौकरी करत हे, त पुलिस ह दबिश देके आरोपित बैंक मैनेजर ल गिरफ्तार कर लीस।
जानबा हे के ये मामला 2016 म दर्ज चार प्रकरण म पुलिस ह आरोपित हीरालाल ल गिरफ्तार करके जेल भेजे रहिस। एखर बाद 2019 म दू अऊ प्रकरण दर्ज करे गीस। ये बीच आरोपित के जमानत हो गीस। जमानत मिले के बाद आरोपित फरार हो गे। पुलिस के बताती दू मामला म आरोपित हीरालाल के गिरफ्तारी जल्दीच करे जाही।