11 करोड़ रुपिया के कर डरे हे ट्रांजेक्शन
मनखे मन के मदद करके मिलथे खुशी- बालेश्वरी, आर्थिक सशक्तिकरण के संग मिलीस अलग पहिचान
सरगुजा, बैंक सखी ग्रामीण अऊ दूरदराज के इलाका मन म बैंकिंग सेवा ल सुलभ बनाए खातिर स्व सहायता समूह के एक प्रशिक्षित महिला सदस्य होथे, जेन सखी के रूप म काम करथे, वो बैंक के प्रतिनिधि के रूप म काम करथे। सरगुजा जिला के विकासखण्ड लखनपुर के ग्राम पंचायत लोसंगी के रहइया बालेश्वरी यादव बैंक सखी के रूप म काम करत हे। वो ह पांच पंचायत लोसंगी, लोसगा, रेमहला, लब्जी, कटिन्दा म मनखे मन तक बैंकिंग सुविधा पहुंचावत हे, गांव वाले मन ओ ल बैंक वाले दीदी कहिथें। काबर के बैकिंग सम्बन्धी जेन काम खातिर मनखे मन ल पहिली बैंक तक जाना परत रहिस, वो काम अब वोखर गांव म ही हो जात हे। बैंक वाले दीदी गांव म आथे अऊ मनखे मन के बैंकिंग लेन-देन के काम करके जाथे।
बालेश्वरी यादव ह बताइस के ओ वृद्धा पेंशन, दिव्यांग पेंशन, मनरेगा मजदूरी भुगतान, स्व- सहायता समूह के राशि के लेनदेन संग आन बैंकिंग काम करत हे। पाछू पांच बछर म वो ह लगभग 11 करोड़ रुपिया ले जादा के राशि के लेनदेन करे हे। बालेश्वरी बताथे के ओ ह अपन बेटा के संग लोसंगी म रहिथे, एखर से पहिली वोखर आय के जरिया मेहनत मजदूरी रहिस, मजदूरी ले मिले पइसा ले ही गुजर-बसर करना परत रहिस।
वो ह बताइस के साल 2014 में जब गांव म स्व-सहायता समूह के गठन होइस, त मोला घलोक वोमा सदस्य बने के इच्छा होइस अऊ मोला रानी लक्ष्मी बाई स्व-सहायता समूह के अध्यक्ष बनाए गीस। एखर बाद मैं ह ग्राम संगठन अऊ क्लस्टर संगठन म घलोक अध्यक्ष के रूप म काम करेंव। एखर बाद सक्रिय महिला अऊ आरवीके बुक कीपर के काम करे के घलोक मौका मिलीस। एखर बाद मोला एनआरएलएम के द्वारा बैंक सखी के बारे म बताए गीस, ए काम खातिर मोला काफी उत्सुकता होइस। हमला आरसेटी के संग बैंक सखी के प्रशिक्षण देहे गीस।
साल 2021 ले मैं ह बैंक सखी के काम करना शुरू करे रहेंव, वो ह कहिस के ए काम ले मोला हर महीना लगभग 15 हजार रुपिया तक कमीशन मिल जाथे। बैंक सखी के काम ले आर्थिक सशक्तिकरण के संग मोला समाज म अलग पहिचान मिले हे, उहें मनखे मन के मदद करके बहुत खुशी मिलथे। मनखे मन ल जब जरूरत होथे, त ओ मन खुद मोला बलाथें। उहें सियान, दिव्यांगजन अऊ जरूरतमंद मन के घर म घलोक मैं बैंकिंग सेवा देथंव। वो ह बताइस के कियोस्क के माध्यम ले अब तक लभगभ 513 गांव वाले मन के जनधन खाता खोले गए हे। उहें बीमा योजना ले घलोक हितग्राही मन ल जोड़े गए हे, जेमां प्रधानमंत्री सुरक्षा बीमा योजना 713, प्रधानमंत्री जीवन ज्योति बीमा योजना 556, अटल पेंशन योजना 600 हे।
बैंक सखी बालेश्वरी गांव-गांव म पहुंचावत हे बैंकिंग सुविधा
