बैंक सखी लता पांडे के मेहनत अऊ नवाचार के मिशन संचालक ह करिस सराहना

कोंडागांव, छत्तीसगढ़ राज्य ग्रामीण आजीविका मिशन के राज्य मिशन संचालक सुश्री जयश्री जैन ह कोंडागांव जिला के केशकाल विकासखंड के ग्राम पंचायत मस्सूकोकोड़ा के दौरा करिन। ए बेरा म ऊंखर संग मुख्य परिचालन अधिकारी श्रीमती एलिस लकड़ा, राज्य सलाहकार स्वच्छ भारत मिशन ग्रामीण श्री रूपेश राठौर, अऊ जिला पंचायत के अधिकारी उपस्थित रहिन।
ए बेरा म मिशन संचालक ह गांव के बैंक सखी श्रीमती लता पांडे ले मुलाकात करिस अऊ ऊंखर काम के सराहना करिन। लता पांडे ह बताइस के वो गांव म वृद्धावस्था पेंशन, विधवा पेंशन, मनरेगा भुगतान, महतारी वंदन योजना, प्रधानमंत्री आवास योजना संग आन योजना मन के राशि के हर महिना लगभग 45 ले 50 लाख रुपिया के लेन-देन करत हे। एखर एवज म ओ ल हर महीना 15 ले 20 हजार रुपिया तक के कमीशन मिलत हे।
स्वरोजगार के संग दूसर ल घलोक देवत हे रोजगार
लता पांडे ह बताइस कि बीसी सखी के रूप म काम करत वो ह अपन आय ले अपन पति बर मोटरसाइकिल रिपेयरिंग गैरेज शुरू कराए हे, संगेच एक कपड़ा के दुकान घलोक संचालित करत हे। अतकेच नइ, वो ह अपन आजीविका गतिविधि मन म सहयोग बर एक आन महिला ल 8,000 रूपिया महीना म रोजगार घलोक प्रदान करे हे।
मिशन संचालक सुश्री जैन ह वोखर ए पहल के सराहना करत कहिन के अपन विकास के संग वो ह दुसर महिला ल घलोक आत्मनिर्भर बनाए के काम करे हे, जेन अनुकरणीय हे। उमन जिला मिशन प्रबंधक विनय सिंह ल निर्देशित करिन के जिला के सबो बैंक सखी मन ल मल्टी-एक्टिविटी आजीविका गतिविधि मन ले जोड़े के पहल सुनिश्चित करव।
महिला समूह मन ल प्राथमिकता देहे के निर्देश
राज्य मिशन संचालक ह मुख्य कार्यपालन अधिकारी, जिला पंचायत कोंडागांव ल निर्देश दीन के ओ मन जिला के सबो विभाग मन ले समन्वय स्थापित करके महिला स्व-सहायता समूह मन ल हर सरकारी योजना के लाभ प्राथमिकता ले देवावंय, जेखर से दीदी मन के आय म बढ़ोतरी होवय अऊ ओ मन लखपति दीदी बन सकंय। एखरे संग उमन स्वच्छ भारत मिशन ग्रामीण के अंतर्गत ठोस अउ तरल अपशिष्ट प्रबंधन अऊ आन स्वच्छता गतिविधि मन के प्रभावी संचालन के जरूरत उपर तको बल दीन।