बरसत पानी म जनता के उछाह के आए बाढ़, चलते रिहिस मुख्यमंत्री के भेंट-मुलाकात कार्यक्रम

रइपुर, 29 जून 2022
मूसलाधार बरसा के बाद तको भेंट-मुलाकात म लोगन के उछाह कमती नइ होइस। भेंट-मुलाकात म तीर-तखार के गाँववाले मन मुख्यमंत्री के आगू म अपन बात रखे बर पहुंचिन। बरसत पानी ल देख मुख्यमंत्री ह गाँववाले मन ले पूछिस कि कार्यक्रम बंद करन कि चलन देवन। गाँववाले मन पूरा उछाह ले भेंट-मुलाकात जारी रखे सहमति दीन। मुख्यमंत्री दाऊ भूपेश बघेल आज कोरिया जिला के मनेन्द्रगढ़ विधानसभा क्षेत्र के ग्राम कटकोना के ग्रामीण मन ले भेंट-मुलाकात करत रिहिसे ।
मुख्यमंत्री दाऊ भूपेश बघेल भेंट-मुलाकात अभियान के तहत आज मनेंद्रगढ़ विधानसभा के ग्राम कटकोना में ‘कटकोना मल्टीयूटिलिटी सेंटर‘ के लोकार्पण करिस। बुधरा नदी म लगभग 6 करोड़ 75 लाख रूपिया के लागत से बनइया एनीकट निर्माण के भूमिपूजन करीन। ये मल्टीविलेज वाटर सप्लाई योजना के अंतर्गत बरदर जल प्रदाय समूह के हिस्सा हरे। उन मन चिरमिरी म लोगन के मांग अउ आवश्यकता ल धियान म रखत पॉलीटेक्निक कॉलेज अउ खड़गवां म स्वामी आत्मानंद अंग्रेजी माध्यम स्कूल खोले के घोषणा करीन। ये बेरा म गृह मंत्री श्री ताम्रध्वज साहू अउ मनेन्द्रगढ़ विधायक डॉ. विनय जायसवाल तको संघरे रिहिन।