मुख्यमंत्री श्री भूपेश बघेल ह शिक्षाविद स्वर्गीय श्री बसंत शर्मा के प्रतिमा के करिन अनावरण

रायपुर, मुख्यमंत्री श्री भूपेश बघेल ह काली बिलासपुर म डीएलएस कॉलेज परिसर म शिक्षाविद अऊ समाजसेवी स्वर्गीय श्री बसंत शर्मा के प्रतिमा के अनावरण करिन। स्वर्गीय श्री शर्मा ह करीबन 25 बरस पहिली निजी क्षेत्र म डीएलएस कॉलेज के स्थापना करे रहिन। कॉलेज म निम्‍न आय समूह के करीबन 2 हजार विद्यार्थी पढ़ाई करत हें। श्री शर्मा के करीबन 55 बरस के उमर म आजे के दिन एक साल पहिली असामयिक निधन हो गए रहिस।
मुख्यमंत्री श्री बघेल ह कॉलेज परिसर म स्वर्गीय श्री बसंत शर्मा के आदमकद प्रतिमा के अनावरण करके ओ मन ल भावपूर्ण श्रद्धांजलि अर्पित करिन। श्री बघेल श्रद्धांजलि सभा म स्वर्गीय श्री बसंत शर्मा ल सुरता करत बहुत भावुक हो गें। ऊंखर संग बिताये समें के सुरता करत उंखर आंखी म पानी आ गए। श्री बघेल ह रूंधे गला ले कहिन – हमन एक सच्चा संगी ल गंवा देन। ये बेरा म बिलासपुर जिला के प्रभारी मंत्री अऊ राजस्व मंत्री श्री जयसिंह अग्रवाल, संसदीय सचिव श्रीमती रश्मि सिंह, विधायक श्री शैलेष पांडेय, महापौर बिलासपुर श्री रामशरण यादव, छत्तीसगढ़ राज्य पर्यटन बोर्ड के अध्यक्ष श्री अटल श्रीवास्तव, छत्तीसगढ़ कृषक कल्याण बोर्ड के अध्यक्ष श्री सुरेंद्र शर्मा, मुख्यमंत्री के सलाहकार श्री प्रदीप शर्मा, नगर निगम रायपुर के सभापति श्री प्रमोद दुबे संग सर्वश्री विजय केशरवानी अऊ विजय पांडेय उपस्थित घलोक रहिन। कवि श्री मीर अली मीर ह कार्यक्रम के संचालन करिन।