लघु वनोपज के माध्यम ले स्व-सहायता समूह के महिला मन होइन आर्थिक रूप ले सशक्त अऊ आत्मनिर्भर
जगदलपुर, 31 जुलाई 2020। बस्तर जिला म महिला मन के आत्मनिर्भर बने के एक नवा गाथा रचे जात हे। वनधन विकास योजना अऊ मुख्यमंत्री कौशल विकास योजना अंतर्गत बस्तर वनमण्डल के अंतर्गत 4 वनवृत म 614 महिला स्व-सहायता समूह मन लघु वनोपज के संग्रहण अऊ प्रसंस्करण के काम करत हें। जिला यूनियन जगदलपुर अउ बस्तर वनमण्डल के अंतर्गत प्राथमिक वनोपज सहकारी समिति विकासखण्ड बकावण्ड के ग्राम राजनगर म काजू प्रसंस्करण केंद्र के स्थापना करे गए हे। छत्तीसगढ़ राज्य लघु वनोपज संघ रायपुर ह यूरोपियन कमीशन योजना के तहत् साल 2013 म काजू संग्राहक मन ल उचित मजदूरी अउ प्रसंस्करण के माध्यम से स्व-सहायता समूह के महिला सदस्य मन ल हर मीना सरलग आमदनी के श्रोत के व्यवस्था करे बर स्थापना के स्वीकृति देहे गए रहिस।
बस्तर क्षेत्र म काजू के वृक्षारोपण साल 1979 ले शासन के कई ठन योजना जइसे- सुनिश्चित रोजगार योजना, जलग्रहण क्षेत्र योजना, रोजगार गारंटी योजना के तहत् वन विभाग, राजीव गांधी जलग्रहण क्षेत्र योजना, हार्टिकल्चर विभाग, पंचायत विभाग कोति ले वन जमीन अउर राजस्व जमीन म करीबन 15 हजार हेक्टर क्षेत्र म काजू के वृक्षारोपण करे गए रहिस। वृक्षारोपण क्षेत्र मन ले ग्रामीण मन हर बछर 07 हजार ले 10 हजार क्विंटल काजू संग्रहण करके अकतहा आय अर्जित करत हें।
जिला यूनियन जगदलपुर के अंतर्गत प्राथमिक वनोपज सहकारी समिति के माध्यम ले साल 2013 ले लगातार काजू फल के संग्रहण अउ प्रसंस्करण के काम कराए जात हे। फेर संग्रहण के मात्रा साल 2013 म 491.64 रहिस, जबकि साल 2016 म 68.00 क्विंटल, 2017 म 177.00 क्विंटल, 2018 म 129.00 क्विंटल अउर 2019 म 42.00 क्विंटल काजू के संग्रहण करे गीस। काजू प्रसंस्करण केंद्र (राजनगर) बकावण्ड के संचालन मां धारिणी करीन स्व-सहायता समूह ह करत हे।
साल 2020 म वन धन विकास योजनांतर्गत 13 प्राथमिक वनोपज सहकारी समिति के 69 महिला स्व-सहायता समूह मन कोति ले कुल 4763.59 क्विंटल काजू के संग्रहण 10 हजार प्रति क्विंटल के दर ले करीबन 06 हजार संग्राहक मन ले ग्राम स्तर अउ हाट बाजार स्तर के संग्रहण केंद्र मन म संग्रहण करके 04 करोड़ 76 लाख 35 हजार ले जादा के राशि के भुगतान करे गए हे। जिला यूनियन रायगढ़ ले 357.20 क्विंटल अउ भानुप्रतापपुर ले 390.79 क्विंटल काजू के घलोक प्रसंस्करण वनधन विकास योजना केंद्र बकावण्ड म करे जात हे।
