- पूरा जोश के संग दण्डकवन म संपन्न कराइन मतदान
- महिला मतदाता मन म दिखिस गजब के उछाह
- दण्डवन मतदान केन्द्र म करीबन 65 प्रतिशत रहिस मतदान
- सड़क अऊ वायु मार्ग के जरिये 104 मतदान दल के होइस वापसी
नारायणपुर, लोकतंत्र के ये महापरब म काली संसदीय निर्वाचन क्षेत्र बस्तर अजजा बर होए मतदान के पहिली नक्सली मन ह निर्वाचन ल प्रभावित करे अउ मतदान दल अऊ सुरक्षा कर्मि मन ल नुकसान पहुंचाए बर फरसगांव अऊ दण्डवन के बीच ब्लास्ट करे रहिन। जेमा सुरक्षा कर्मि अऊ मतदान दल कोनो नुकसान नइ होइस। मतदान के अधिकारी-कर्मचारी मन ह बताइन के ब्लास्ट उंखर आघू म होइस फेर दूरिहा होए रहिस। ब्लास्ट म एक मतदान दल कर्मी टाकेश्वर सिंग के हाथ म पथरा छिटक के लगे रहिस। थोकन मतदान के समान मन म घलोक एकर असर होइस, फेर मतदान दल के हौसला म कोनो कमी नइ आइस अऊ उमन मतदान केन्द्र पहुंचके स्वतंत्र, निष्पक्ष अऊ शांतिपूर्ण मतदान संपन्न कराके सकुशल वापस आइन अऊ उमन नियमानुसार मतदान सामान ल जमा तको करिन।
कलेक्टर श्री पी.एस.एल्मा अऊ पुलिस अधीक्षक श्री मोहित गर्ग सरलग मतदान दल अऊ सुरक्षा कर्मि मन के संपर्क म रहिन अऊ पल-पल के जानकारी लेत रहिन। मतदान दल मन ल निरधारित मतदान समय के बाद सकुशल वापस लाइन। ये खबर लिखे जाय तक सड़क मार्ग ले गये सबो 94 मतदान दल के सुरक्षित वापसी हो गीस। उन्हें हेलीकाप्टर ले 10 मतदान दल ल वापस लाए गीस। जेमां ओरछा विकासखंड के 8 अऊ कन्हारगांव के 2 मतदान दल सामिल हे। बांचे मतदान दल ल आज सुकरवार को हेलीकाप्टर के जरिये वापस लाए जाही।
दण्डवन मं 3 मतदान केन्द्र छिनारी मतदान केन्द्र नंबर 104, बागझर मतदान केन्द्र नंबर 105, अऊ दण्डवन मतदान केन्द्र नंबर 108 रहिस। ए तीनों मतदान केन्द्र म मतदाता मन के संख्या 1945 हे। उन्हें छिनारी मतदान केन्द्र म 665 मतदाता मन ले 389 मतदाता मन ह अपन मताधिकार के प्रयोग करिन। अइसनहे बागझर म 419 मतदाता म ले 274 मतदाता मन ह वोट डारिन। उन्हें दण्डवन मतदान केन्द्र म 861 मतदाता मन म ले 598 मतदाता मन ह अपन मत के प्रयोग करिन। ए प्रकार तीनों मतदान केन्द्र म 1261 मतदाता मन ह अपन मताधिकार के प्रयोग करिन। मतदान के प्रतिशत करीबन 65 प्रतिशत रहिस। महिला मतदाता मन म गजब के उत्साह देखे गीस। उन्हें पुरूष मतदाता मन ह घलोक बढ़चढ़ के लोक तंत्र के मजबूती बर बिना डेराए अपन मत के प्रयोग करिन।
छिनारी मतदान केन्द्र नंबर 01 के पीठासीन अधिकारी महेन्द्र सिंह देहारी रहिन। ए मतदान दल म महेशराम मांझी, मोहन कुमार नाग अऊ जयभान नाग के ड्यूटी रहिस। उन्हें बागझर मतदान केन्द्र म पीठासीन अधिकारी मोतीलाल नाग समेत मतदान कर्मी प्रवीण कुमार साहू, विजय कुमार कोर्राम अऊ शामनाथ पत्तावी सामिल रहिन। अइसनहे दण्डवन मतदान केन्द्र म पीठासीन अधिकारी लवन कुमार बंजारे ल बनाय गए रहिस। मतदान दल कर्मी के रूप म सर्वश्री ठाकेश्वर सुधाकर, लखमाराम उसेण्डी अऊ सुखदेव कोर्राम ल मतदान संबंधी दायित्व सौंपे गए रहिस। ए सबो 12 मतदान कर्मि मन ल फरसगांव पुलिस कैंप ले कड़ा सुरक्षा के बीच झुलझुलहेच पैदल दण्डवन मतदान केन्द्र कोति ले जावत रहिन। फरसगांव ले करीबन 3-4 किलोमीटर दूरिहा के बाद नक्सली मन ह निर्वाचन म व्यावधान उत्पन्न करे के कोसिस करिन। फेर पुलिस के चाक-चौबंद व्यवस्था के सेती कोनो जन हानि नइ होइस।
