रायपुर, 26 सितंबर 2024। आज उपमुख्यमंत्री श्री विजय शर्मा ह अपन निवास कार्यालय म माओवादी हिंसा ले पीड़ित बस्तर के लगभग 55 नागरिक मन के गर्मजोशी ले स्वागत करिन, जेन अपन व्यथा अऊ समस्या मन ल लेके दिल्ली गे रहिन। उपमुख्यमंत्री श्री शर्मा ह व्यक्तिगत रूप ले हरेक पीड़ित ले मुलाकात करिन अऊ उंखर हालचाल जानिन। उपमुख्यमंत्री ह उंखर पीरा ल ध्यान से सुनिन। ए मौका म उमन पीड़ित मन ल दैनिक जरूरत के समान जइसे रेडियो, घड़ी, थाली, लोटा, गिलास, टॉर्च, छत्तीसगढ़ी व्यंजन, बैग अऊ लइका मन बर चॉकलेट भेंट करके उंखर सहायता करिन।
उपमुख्यमंत्री श्री विजय शर्मा ह कहिन के बस्तर के गांव-गांव म विकास के रद्दा ल नक्सली मन ह आईईडी ले जकड़ रखे हे। ये आईईडी न गांव वाले मन ल चिन्हय, न जानवर मन ल। एखर धमाका म सैकड़ों मनखे अपंग हो गे हे। कोनो के पैर कट गए हे, कोनो के आंखी चल देहे हे, त कोनो अपन हाथ खो चुके हे। ये माओवादी हिंसा गांव मन ल दहशत म डाले के काम करत हे। उपमुख्यमंत्री ह कहिन के इहां उपस्थित सबो मनखे उन मानवाधिकार समर्थक मन ले सवाल करत हें जेन नक्सली मन के समर्थन करथें। आखिर काबर कोनो बस्तर के मनखे मन के पीरा उपर चर्चा नइ करय? बस्तर के गांववाले मन के जिंदगी उपर कोनो काबर नइ बोलय? ये अत्याचार कब तक चलही?
उपमुख्यमंत्री श्री शर्मा ह ये घलोक कहिन के माननीय मुख्यमंत्री श्री विष्णु देव साय अऊ केंद्रीय गृह मंत्री श्री अमित शाह के संकल्प के मुताबिक बस्तर अऊ पूरा छत्तीसगढ़ ले नक्सलवाद के अंत करे जाही। जेन मनखे सुरक्षा बल मन के मनोबल ल तोड़े के कोसिस करत हे, ओ मन ल ये समझना चाही के ये केवल बस्तर के न हीं भलुक पूरा देश के मुद्दा ये। नक्सली बस्तर के विकास अऊ मनखे मन के शांति ल बर्बाद करे म लगे हे अऊ एकर प्रतिकार अब जरूरी हो गए हे।
ए बेरा म उपमुख्यमंत्री श्री शर्मा ह बस्तर के पीड़ित मन के हौसला बढ़ाइन अऊ ऊंखर संग मजबूती ले खड़े रहे के आश्वासन दीन। उमन कहिन के बस्तर के मनखे माओवादी आतंक के खिलाफ मजबूती ले खड़े हे अऊ सरकार ऊंखर संग पूरा शक्ति ले ए लड़ाई ल लड़ही।
