बस्तर क्रिएटर हब स्टूडियो के उप मुख्यमंत्री विजय शर्मा ह करिन सुभारंभ, युवा मन ला मिलही नवा मंच

जगदलपुर, स्वतंत्रता दिवस के मउका म उप मुख्यमंत्री श्री विजय शर्मा ह जगदलपुर के लाला जगदलपुरी ग्रंथालय परिसर म बने ‘बस्तर क्रिएटर हब स्टूडियो’ के सुभारंभ करिन। आधुनिक तकनीक ले सजे ए क्रिएटर हब ले बस्तर के युवा मन ला अपन रचनात्मकता, कला, संस्कृति, पर्यटन अउ नवा विचार मन ला दुनिया के आगू लाए के बढ़िया मंच मिलही।
सुभारंभ के बाद क्रिएटर हब के पहिली पॉडकास्ट म उप मुख्यमंत्री के इंटरव्यू घलो रिकार्ड करे गीस, जेमा उन बस्तर के विकास अउ युवा मन के भूमिका ऊपर गोठ-बात करिन। ए हब म युवा मन बर कंटेंट बनाए, पॉडकास्ट, वीडियो अउ डिजिटल मीडिया के आधुनिक सुविधा रखे गे हे।
ए मउका म महापौर श्री संजय पाण्डेय, जिला सहकारी बैंक अध्यक्ष श्री दिनेश कश्यप, कमिश्नर श्री डोमन सिंह, आईजी श्री बद्रीनारायण मीणा, कलेक्टर श्री आकाश छिकारा अउ पुलिस अधीक्षक श्री शलभ सिन्हा संग अउ आन अधिकारी-जनप्रतिनिधि मन संघरे रहिन।