- नारायणपुर म मुख्यमंत्री श्री भूपेश बघेल ह करिन घोषणा
- सबो 104 पंचायत मन म 9-9 लाख के लागत ले देवगुड़ी मन के घलोक होही विकास
नारायणपुर, 9 जनवरी 2021। युवा मन के पारंपरिक चेतना केंद्र के रूप म प्रसिद्ध, फेर अब लुप्त होवत बस्तर के घोटुल (गोटुल) परंपरा ल मुख्यमंत्री श्री भूपेश बघेल के घोषणा ले पुनर्जीवन मिले के उम्मीद बंधे हे। आज नारायणपुर म श्री बघेल ह जिला म ये साल 100 घोटुल के निर्माण के घोषणा करिन। संगे-संग उमन इहां के सबो 104 पंचायत मन म 9-9 लाख रुपिया के लागत ले देवगुड़ी मन के विकास करे के घलोक घोषणा करिन।
अपन नारायणपुर दउरा के बेरा म मुख्यमंत्री श्री बघेल ह घोटुल अऊ देवगुड़ी मन के संबंध म करे घोषणा मन ल बस्तर के सांस्कृतिक संरक्षण के दृष्टि ले महत्वपूर्ण माने जात हे। श्री बघेल ह कहिन के बस्तर के घोटुल परंपरा ल देखे समझे बर देश-विदेश ले मनखे आथें। घोटुल हमार युवा मन के सामाजिक गतिविधि मन के केंद्र रहे हे, उहां बइठके ओ मन अपन गांव अऊ क्षेत्र के विकास के चर्चा करथें। उमन कहिन के नारायणपुर दउरा के बेरा म कुछ मनखे मन ह उंखर से कहिन के शासन ल घोटुल मन के निर्माण घलोक कराना चाही, संगेच ये साल 50 घोटुल के निर्माण के मांग घलोक करिन। मुख्यमंत्री ह ये मांग ले सहमति प्रकट करत कहिन के मैं ये साल 100 घोटुल के निर्माण के घोषणा करत हंव, ये मां चाहे 10 लाख रुपिया लगय या 12 लाख, पइसा के कोनो कमी नइ आए देहे जाय। उमन कहिन के नवा घोटुल मन के स्ट्रक्चर भले पक्का होवय, फेर ओखर डिजाइन अऊ साज-सज्जा परंपरागत ही होना चाही, ताकि हमर प्राचीनता के पहिचान बने रहय। श्री बघेल ह जिला के सबो पंचायत मन म देवगुड़ी मन के विकास के घोषणा करत कहिन ए स्थल मन म शौचालय के निर्माण अऊ पेयजल व्यवस्था घलोक करे जाही।