बस्तर संभाग के 6.98 लाख परिवार मन ल मिलही लाभ
रायपुर, मुख्यमंत्री श्री भूपेश बघेल के नेतृत्व म बने राज्य के नवा सरकार आदिवासी बहुल बस्तर अंचल म कुपोषण दूर करे बर गंभीर हे। राज्य म कुपोषण दूर करे बर शुरू करे गए सबो नवा योजना मन के शुरूआत बस्तर ले ही हो गए हे। हालेच म शुरू को गए सुपोषण अभियान अऊ हाट-बाजार मन म स्वास्थ्य परीक्षण के योजना के आगाज घलोक बस्तर ले ही होय हे। इही दिशा म एक अऊ पहल करत मुख्यमंत्री श्री भूपेश बघेल के अध्यक्षता म बुधवार के संझा आयोजित केबिनट के बैठक म बस्तर म चना के संगें-संग हर महिना दू किलो गुड़ निःशुल्क देहे के निर्णय ले गए हे।
राज्य सरकार के ये निर्णय ले बस्तर संभाग के 6 लाख 98 हजार 188 राशन कार्डधारी परिवार मन ल सीधा लाभ मिलही। बस्तर संभाग म अंत्योदय गुलाबी, स्पेशल गुलाबी अऊ प्राथमिकता वाले नीला राशनकार्डधारी 6 लाख 98 हजार परिवार हे। ए सबो परिवार वाले मन ल उचित मूल्य के राशन दुकान मन के माध्यम ले हर महिना चना के संगें-संग अब दू किलो गुड़ घलोक दे जाही। कुपोषण दूर करे बर चना अऊ गुड़ ल उत्तम माने जाथे। राज्य सरकार कोति ले चना के संग गुड़ देहे के निर्णय ले ये अंचल म कुपोषण ल दूर करे म मदद मिलही। बताना जरूरी हे कि 19 जून 2019 ले बस्तर अऊ दंतेवाड़ा जिला म सुपोषण अभियान पायलेट प्रोजेक्ट के रूप म चलाए जावत हे, जेखर तहत गर्भवती माता, लइका मन, किशोरी मन ल पौष्टिक आहार के रूप म चावल, रोटी, दाल, साग भाजी, सलाद, लडडू देहे जात हे। आंगनबाड़ि मनम घलोक लइका मन ल डाईट चार्ट के अनुसार रेडी-टू-ईट के अलावा केला अऊ हफ्ता म एक दिन अंडा दे जावत हे। महिला बाल विकास विभाग कोति ले अब हफ्ता म दू दिन अंडा देहे के योजना बनाए जात हे।
बस्तर संभाग के जिला मन म मैदानी क्षेत्र मन के जिला मन के तुलना म कुपोषण के दर जादा हे। महिला अऊ बाल विकास विभाग ले मिले जानकारी के मुताबिक बस्तर जिला म कुपोषण के दर 34 प्रतिशत हे, जबकि दंतेवाड़ा म 36 प्रतिशत, बीजापुर म 39 प्रतिशत, नारायणपुर म 31.96, कांकेर म 27.1 प्रतिशत, सुकमा म 45 प्रतिशत अऊ कोण्डागांव जिला म कुपोषण के दर 39.36 प्रतिशत हे। राज्य सरकार के चना के संग गुड़ देहे के योजना ले बस्तर जिला के एक लाख 80 हजार 496, बीजापुर जिला के 61 हजार 398 अऊ दंतेवाड़ा जिला के 70 हजार 887 परिवार मन ल लाभ मिलही। अइसनहे कांकेर जिला के एक लाख 54 हजार 491, कोण्डागांव जिला के एक लाख 25 हजार 401, नारायणपुर जिला के 30 हजार 606 अऊ सुकमा जिला के 74 हजार 909 परिवार मन ल ये योजना के लाभ मिलही।
