जगदलपुर, मुख्यमंत्री श्री भूपेश बघेल ह आज अपन एक दिवसीय बस्तर जिला प्रवास म जगदलपुर म संभागीय सी-मार्ट के शुभारंभ करिन। उमन सी-मार्ट म उपलब्ध हस्तशिल्प, बांसशिल्प, बेल मेटल, बस्तर कोसा ले बने कपड़ा, हथकरघा, वन उत्पाद, महिला समूह मन कोति ले बने रंग-रंग के समान मन के अवलोकन करिन। ये बेरा म उमन जामुन जूस, आमला आचार, आमला जूस, महुआ लड्डू, महुआ कुकीज, बस्तर काजू, जिमिकंद आचार, फॉरेस्ट हनी, टमाटर चटनी, विष्णु ब्राह्मी भृंगराज केश तेल, हवन अउ पूजन सामान के खरीदी करिन अऊ संभागीय सी-मार्ट के बोहनी कराईन। मुख्यमंत्री संग सी-मार्ट पधारे सबो जनप्रतिनिधि मन ह जामुन जूस अऊ मसाला काजू के सुवाद लीन।
जानबा हे कि कुटीर उद्योग ल बढ़ावा देहे के संग कृषक अउ वनोपज संग्राहक, हस्तशिल्पकार, स्थानीय प्रसंस्करणकर्ता अऊ निर्माता मन के आय म बढ़ोतरी बर मुख्यमंत्री श्री भूपेश बघेल ह जगदलपुर के जुन्ना बस स्टैण्ड के तीर नगर निगम के कॉम्पलेक्स म संभागीय सी-मार्ट के शुभारंभ करिन। करीबन एक करोड़ 55 लाख रुपिया के लागत ले बने सी-मार्ट म कई ठन शासकीय अऊ अर्धशासकीय संस्था, गोठान, स्व-सहायता समूह, कृषि उत्पादक संगठन मन के माध्यम ले राज्य के कृषक, कामगार, शिल्पकार, बुनकर आदि के उत्पादित समान बेंचाए बर उपलब्ध होही।
मुख्यमंत्री ह चिखिस बस्तर के मसाला काजू अऊ जामुन जूस के सुवाद
