बस्तर ले गणतंत्र के बात कार्यक्रम: मुख्यमंत्री ह बस्तर ल मलेरिया, कुपोषण अऊ एनीमिया ले मुक्ति के संकल्प दोहराइन
रायपुर, 25 जनवरी 2020। मुख्यमंत्री श्री भूपेश बघेल ह कहिन हे कि राज्य सरकार बस्तर के मनखे मन के पूरा विकास करे बर कटिबद्ध हे अऊ ये दिशा म हरसंभव कोसिस जारी रइही। उमन बस्तर ल मलेरिया ले मुक्त करे के संग कुपोषण अऊ एनीमिया ल समूल खतम करे के संकल्प दोहराइन। ओ मन आज जिला मुख्यालय दंतेवाड़ा म एक निजी समाचार चैनल कोति ले आयोजित बस्तर ले गणतंत्र के बात कार्यक्रम ल संबोधित करत रहिन। कार्यक्रम म उमन गढ़बो नवा छत्तीसगढ़ के दिशा म चलाए जात अभियान अऊ योजना मन के विसय म परखर जानकारी दीन। उमन नक्सल उन्मूलन बर सकारात्मक पहल के बात कहिन।
मुख्यमंत्री श्री बघेल ह दन्तेवाड़ा जिला म संचालित मेहरार चो मान योजना के तारीफ करत कहिन कि एखर से महिला मन अऊ किशोरी मन म स्वच्छता अऊ साफ-सफाई के प्रति न केवल जागरूकता आवत हे बल्कि ये पहल ले स्थानीय स्तर म रोजगार घलोक मिलत हे। उमन कार्यक्रम म सुपोषण अभियान संचालित करइया महिला समूह मन अऊ आंगनबाड़ी कार्यकर्ता, मितानिन मन ले चर्चा करिन अऊ ये अभियान म उंखर सक्रिय भागीदारी ल अमूल्य योगदान बताइन। मुख्यमंत्री ह कहिन कि बस्तर अंचल के ग्रामीण क्षेत्र मन म मनखे मन के सुविधा बर चलाए जात हाट बाजार क्लीनिक योजना ले अंदरूनी ईलाका मन म रहइया मनखे मन ल अब स्वास्थ्य जांच अऊ उपचार के बढि़या सुविधा मिलत हे। मुख्यमंत्री ह जैविक खेती करइया किसान मन के उत्पाद मन के अवलोकन करिस अऊ किसान मन ल आमदनी के जरिया बढ़ाए बर ये दिशा म सरलग उदीम करे के समझाईश दीन। ये दौरान साग-सब्जी के खेती अऊ फलोद्यान के संग आमदनी बढ़इया किसान मन ले रूबरू होइन अऊ ऊंखर उदीम मन ल सहराईन। कार्यक्रम म उद्योग मंत्री श्री कवासी लखमा, विधायक दन्तेवाड़ा श्रीमती देवती कर्मा अऊ क्षेत्र के जनप्रतिनिधि मन के संग गणमान्य नागरिक मौजूद रहिन।