रायपुर, 25 जनवरी 2020/ मलेरिया मुक्त बस्तर अभियान के सुरुवात म स्वास्थ विभाग के सचिव श्रीमती निहारिका बारिक सिंह ह मलेरिया मुक्त बस्तर अभियान के जानकारी दीन। उमन कहिन कि बस्तर म परजीवी सूचकांक सबले जादा हे। प्रदेश म मलेरिया के प्रकरन मन म ले 72 प्रतिशत प्रकरण बस्तर ले आथे। ए खातिर ए अभियान के शुरुआत बस्तर ले करे जात हे। उमन कहिन कि मलेरिया के जांच अऊ उपचार बर पूरा संभाग म 1720 मलेरिया दल के गठन करे गए हे। अब तक पांच लाख ले जादा मनखे मन के जांच हो गए हे, जेमां ले 22 हजार 777 व्यक्ति मलेरिया ले पीड़ित पाए गए हें। उमन कहिन कि जनवरी, जुलाई अऊ नवम्बर म मलेरिया जादा होथे। जनवरी म अभियान के ये पहलइया चरण हे। जुलाई अऊ नवम्बर म मलेरिया मुक्त बस्तर अभियान के दूसरा अऊ तीसरा चरण चालू करे जाही।
कार्यक्रम के आखरी म राष्ट्रीय ग्रामीण स्वास्थ्य मिशन के संचालक सुश्री प्रियंका शुक्ला ह आभार व्यक्त करिस। ए बेरा म कमिश्नर श्री अमृत कुमार खलखो, पुलिस महानिरीक्षक श्री सुंदरराज पी., कलेक्टर श्री टोपेश्वर वर्मा, पुलिस अधीक्षक डाॅ. अभिषेक पल्लव, संग बहुत अकन वरिष्ठ अधिकारी अऊ नागरिक उपस्थित रहिन।