रइपुर, 20 अप्रैल 2021 मंगल । मुख्यमंत्री दाउ भूपेश बघेल ह आज इहां अपन घरू कार्यालय म आयोजित वर्चुअल बइठका म बस्तर संभाग के 7 जिला कांकेर, कोंडागांव, बस्तर, बीजापुर, नारायणपुर, सुकमा अउ दंतेवाड़ा म कोरोना संक्रमण के वर्तमान स्थिति अउ उन्कर नियंत्रण के उपाय मन के समीक्षा करीन।
मुख्यमंत्री दाउ बघेल ह समीक्षा करत कहीन कि राज्य के बस्तर संभाग म पीछू पइत कोरोना संक्रमण ल रोके म शासन-प्रशासन मिलाके सबके सहयोग ले बने सफलता मिले रिहिसे । ये पइत तको हम सबो बस्तर संभाग म कोरोना संक्रमण के दर ल पीछू पइत बरोबर शून्य प्रतिशत तक लाने के उदीम करन । उन मन कहीन कि बस्तर संभाग के अधिकारी-कर्मचारी बने बूता करत हावय । अपन कर्तव्य मन के प्रति सजगता ले ही लक्ष्य ल पाए म बजुर सफलता मिलही ।
मुख्यमंत्री ह कहीन कि बस्तर म संक्रमण झन बगरै एकर बर ये जरूरी हे कि बाहिर ले अवइया हर मनखे बिना टेस्टिंग के न तो गांव म अउ न ही शहर म जावय । आवश्यकता अनुसार उन् मन ल क्वारेंटाइन सेंटर अउ आइसोलेशन केेन्द्र म रखे
बेवस्था करे जाय। बाहिर ले अवइया मन के एयरपोर्ट, रेल्वे स्टेशन, बस स्टेंड, अंतर्राज्यीय सीमा मन के एन्ट्री पाइंटेच म टेस्टिंग सुनिश्चित कर लेवयं। हमर फोकस टेस्टिंग के संगे-संग मरीज मन के इलाज, वैक्सीनेशन, कोरोना संक्रमण के रोकथाम अउ संक्रमित मनखे मन के कॉन्टेक्ट ट्रेसिंग अउ सघन जांच म होना चाही। कॉन्टेक्ट ट्रेसिंग ले संक्रमण ल रोके म काफी हद तक मदद मिलही।
मुख्यमंत्री ह कहीन कि छुट्टी ले लहुटइया सीआरपीएफ अउ पैरामिलिट्री फोर्स के जवान मन ल टेस्टिंग अउ क्वारेंटाइन के पीछू ही कैम्प मन म भेजे जावय।
खदान क्षेत्र मन म बाहिर ले अवइया ड्राइवर अउ क्लीनर मन के जांच अउ मजदूर मन ले अलग राखे के होवय बेवस्था।
मुख्यमंत्री ह कहीन कि लॉकडाउन के दौरान लोगन मन ल रोजगार उपलब्ध कराए बर कोविड के गाइडलाइन के पालन करत मनरेगा अउ लघु वनोपज मन के संग्रहण के काम प्रारंभ करे जाय। जेकर ले लोगन ल सुगमता ले रोजगार मिलही अउ आय तको मिलही।
मंत्री श्री टी.एस. सिंहदेव ह बस्तर संभाग म कोरोना संक्रमण के स्थिति के बारे म जानकारी दीन ।
मुख्यमंत्री दाउ बघेल ह बइठका म बस्तर संभाग के जम्मो जिला म ऑक्सीजन बेड, आईसीयू बेड, वेंटिलेटर वाले बेड के उपलब्धता, ऑक्सीजन के सप्लाई चैन, ऑक्सीजन सिलेंडर मन के उपलब्धता अउ रोटेशन, मेडिकल स्टाफ के उपलब्धता, रेमडेसिविर अउ आने आवश्यक दवाई मन के उपलब्धता अउ सीएसआर मद, औद्योगिक क्षेत्र अउ सामाजिक संगठन मन के सहयोग ले करे जावत बूता मन के समीक्षा करीन ।
बइठका म स्वास्थ्य मंत्री श्री टी.एस. सिंहदेव, मुख्य सचिव श्री अमिताभ जैन, अपर मुख्य सचिव स्वास्थ्य श्रीमती रेणु जी. पिल्ले, अपर मुुख्य सचिव गृह श्री सुब्रत साहू, मुख्यमंत्री के सचिव श्री सिद्धार्थ कोमल सिंह परदेशी, बस्तर संभाग के कमिश्नर, आई.जी., जम्मो 7 जिला मन के जिला कलेक्टर अउ पुलिस अधीक्षक संघरे रिहिन।
