बस्तर म वनोपज ले रोजगार के भरपूर संभावना: दाउ भूपेश बघेल

रइपुर 20 जून 2021 इतवार। मुख्यमंत्री दाउ भूपेश बघेल ह कहीन कि बस्तर म बहुमूल्य वनोपज मन के वेल्यूएडिशन ले रोजगार के बहुते हवय। वनोपज मन के वेल्यूएडिशन अउ उन्कर व्यापार ले बस्तरे भर के युवा मन के संगे संग आने क्षे​त्र के लोगन मन ल तको रोजगार अउ आय के बने साधन उपलब्ध कराए जा सकत हे। दंतेवाड़ा के डेनेक्स फैक्ट्री म तियार गारमेंट अब बेंगलूरू जावत हे।
मुख्यमंत्री ह आदिवासी अंचल के लोगन मन के जीवन स्तर ल ऊपर उठाए म कोण्डागांव अउ दंतेवाड़ा जिला प्रशासन के अधिकारी-कर्मचारी अउ जनप्रतिनिधि डाहर ले करत बूता
ल सहराइस अउ उन मन ल बधई दीन। कहीन कि हमार खेत अउ जंगल हमार असली ताकत हरे, अपन इही ताकत ले हम नवा छत्तीसगढ़ के निर्माण करत हवन।
मुख्यमंत्री दाउ भूपेश बघेल आज अपन घरू कार्यालय म चलत वर्चुअल कार्यक्रम म कोण्डागांव अउ दंतेवाडा जिला म 544 करोड़ 86 लाख रूपिया के 788 ठिन विकास कार्य मन के लोकार्पण अउ भूमिपूजन के बाद समारोह ल सम्बोधित करत रिहिने।
मुख्यमंत्री ह कहीन कि कोण्डागांव जिला म कुपोषण के दर कम करे म मुख्यमंत्री सुपोषण अभियान ल बने सफलता मिलीस । ये जिला म कुपोषण के दर म 43 प्रतिशत के कमी आईस हे, जोन छत्तीसगढ़ के इतिहास म पहिली पइत होए हे । ओइसनेहे दंतेवाड़ा जिला म तको कुपोषण दर म 27 प्रतिशत के कमी आए हे।
दाउ बघेल ह कोण्डागांव म 4 करोड 72 लाख रूपिया लागत ले बनइया कोण्डानार स्पोर्ट्स अकादमी के संगे—संग कोण्डानार गारमेंट फैक्ट्री अउ केशकाल के तीर टाटामारी रिसॉर्ट के भूमिपूजन करीन। कोण्डागांव जिला म एरोमेटिक कोण्डानार अभियान के शुभारंभ करीन। उहेंचे बारसूर म डेनेक्स गारमेंट फैक्ट्री के दूसरइया यूनिट के लोकार्पण करत नवा दंतेवाड़ा गारमेंट फैक्ट्री अउ डेनेक्स अमचुर के वाहन ल वर्चुअल रूप ले झण्डी देखाके रवाना करीन अउ दंतेवाड़ा औद्योगिक क्षेत्र के नामकरण स्वर्गीय श्री महेन्द्र कर्मा के नाम म करे के घोषणा करीन।