उप मुख्यमंत्री श्री शर्मा ह वनांचल ग्राम कच्चापाल म बस्तर ओलंपिक 2025 के करिन शुभारंभ

नारायणपुर, छत्तीसगढ़ शासन कोति ले पारंपरिक खेल मनल प्रोत्साहित करे, बस्तर संभाग के जनजातीय बहुल अऊ नक्सल प्रभावित क्षेत्र मन म युवा मन के खेल प्रतिभा ल पहिचाने अऊ ओ मन ल मुख्यधारा ले जोड़े के उद्देश्य ले ‘बस्तर ओलंपिक 2025’ के आयोजन करे जात हे। जेखर नारायणपुर के सुदूर वनांचल ग्राम कच्चापाल में  शुभारंभ आज उप मुख्यमंत्री श्री विजय शर्मा ह करिन। 
ए बेरा म ईरकभट्टी अऊ कच्चापाल के ग्रामीण महिला मन के बीच रस्साकसी प्रतियोगिता आयोजित करे गीस, जेमां ईरकभट्टी के महिला मन ह बाजी मारिन। उपमुख्यमंत्री ह खिलाड़ी मन ले मुलाकात कर सबो के उत्साहवर्धन घलोक करिन। उमन खिलाड़ी मन म उत्साह ल देखत सबो ल बस्तर ओलंपिक 2025 के टीशर्ट बांटिन। ये प्रतियोगिता विकासखंड, जिला अऊ संभाग स्तर म तीन चरण म आयोजित होही। बस्तर ओलंपिक 2025 म बस्तर संभाग म 03 लाख 80 हजार ले जादा प्रतिभागी मन ह भाग लेवत हें, जेमां नारायणपुर म 47 हजार ले जादा प्रतिभागी सामिल हे। 
ए कार्यक्रम म उपमुख्यमंत्री श्री शर्मा ह गांव वाले मन ल संबोधित करत कहिन के बस्तर ओलंपिक केवल खेल भर नो हे ये बस्तर के समरसता, बंधुत्व, विश्वास अऊ एकता के चिन्‍हारी घलोक ये। ये ओलंपिक बस्तर के युवा मन ल अपन नैसर्गिक प्रतिभा के प्रदर्शन के एक मंच देवत हे संगेच ये ह उमन म आत्मविश्वास जगाए अऊ खेल प्रतिभा मनल आगू बढ़ाए के एक माध्यम घलोक हे। हमना पूरा भरोसा हे कि ए ओलंपिक के माध्यम ले अंतरराष्ट्रीय स्तर के खिलाड़ी घलोक प्रदेश ल मिलही जेन प्रदेशे म ही न ही बल्कि पूरा विश्व म बस्तर के नाव ऊंचा करही। 
ये बेरा म जिला पंचायत अध्यक्ष श्री नारायण मरकाम, उपाध्यक्ष श्री प्रताप सिंह मंडावी, एडीजी श्री विवेकानंद सिन्हा, कमिश्नर श्री डोमन सिंह, आईजी श्री सुंदरराज पी, कलेक्टर प्रतिष्ठा ममगाईं, एसपी श्री रॉबिंसन गुड़िया, एसडीएम ओरछा डॉ. सुमित गर्ग, जनपद उपाध्यक्ष ओरछा श्री मंगडूराम नूरेटी सरपंच कच्चापाल श्रीमती रजमा नूरेटी, जनपद सदस्य जनप्रतिनिधि संग बड़ संख्या म ग्रामीणजन उपस्थित रहिन।