नो प्रॉफिट नो लॉस म बेचत हें फल अऊ साग-भाजी
नारायणपुर, 07 अप्रैल 2020। पूरा दुनिया संग भारत देश म जिहां कोराना वायरस के रोकथाम अउ नियंत्रण बर मनखे मन एक जुटता के संग खड़े हे। उहें नक्सल प्रभावित जिला नारायणपुर के ग्रामीण महिला मन के संगेच संतोषी स्वसहायता समूह के ग्राम बेनूर के सुश्री आसमती अऊ छोटेडोंगर के रोशनी महिला स्व सहायता समूह के सुश्री पूर्णे आदिवासी महिला मन नो प्रॉफिट नो लॉस म फल अऊ साग-भाजी बेंचत हें। ये महिला मन मानवता के दूत जइसे काम करत हें। लॉकडाउन के सेती हॉट-बाजार सब बंद होए ले गांव वाले मन ल फल-सब्जी बर दिक्कत होवत हे। खासकर सियान अऊ आन रोग ले पीड़ित मनखे मन ल जादा परेसानी होवत हे।
ए दिक्कत ल दूर करे बर स्थानीय स्वसहायता समूह के आदिवासी ग्रामीण महिला मन आगू आए हें। मनखे मन के रोजमर्रा के जरूरत के चीज फल-सब्जी अऊ किराना सामान जनता मन तक पहुचाए खातिर ए मन ठेला-दुकान खोले के शुरूआत करे हें। ए हाथ ठेला म तरबूज, सेब, अनार, अंगूर के संग सब्जी घलोक न लाभ-न हानि के तर्ज म बेंचत हें। आप मन जानतेच हव के नारायणपुर म स्व-सहायता समूह ह अबूझमाड़ बिहान मार्ट नाम ले किराना दुकान खोले हें। जिहां मनखे अपन जरूरत के हिसाब ले खरीदी करत हे। लॉकडाउन के समय महिला मन मनखे मन के मदद करे बर आगू आवत हें। पाछू एक अप्रैल के मुख्यमंत्री श्री भूपेश बघेल ह आंगनबाड़ी कार्यकर्ता मन के नाम चिठ्ठी लिखे रहिन। जेमा उमन ऊंखर काम के तारीफ करे रहिन अऊ संकट के समय म जादा जिम्मेदारी निभाए अऊ मनखे मन ल जागरूक करे के अपील करे रहिन।
