गुजरात के धरती म बस्तर के सम्मान — एकता परेड म छत्तीसगढ़ के झांकी ह जीतिस देश के दिल

रायपुर, गुजरात के एकता नगर म सरदार वल्लभभाई पटेल के 150वां जयंती म आयोजित एकता परेड म छत्तीसगढ़ के झांकी “बस्तर के धरती – संस्कृति, सृजन अऊ प्रगति के गाथा” आकर्षण के केंद्र रहिस। ए झांकी ह बस्तर के समृद्ध जनजातीय जीवन, परंपरा अऊ विकास यात्रा ल अद्भुत रूप म प्रस्तुत करे गीस।
प्रधानमंत्री नरेंद्र मोदी ह सबो राज्य के झांकी मन के अवलोकन करिन अऊ छत्तीसगढ़ के झांकी ल सहराईन। झांकी के आगू म माड़िया जनजाति के कलाकार मन कोति ले प्रस्तुत गौर नृत्य ह बस्तर के सामूहिकता अऊ लोक उल्लास के जीवंत चित्रण करे गीस। पारंपरिक तुरही अऊ नंदी के प्रतिमा ह लोक आस्था अऊ शिव भक्ति के सुंदर संदेश दीस।
बीच भाग म बस्तर के विकास के कहानी देखाए गीस — कभू नक्सलवाद ले प्रभावित ये क्षेत्र आज शिक्षा, स्वास्थ्य, सड़क अऊ रोजगार म नवा पहिचान बनावत हे। प्रधानमंत्री नरेंद्र मोदी अऊ मुख्यमंत्री विष्णुदेव साय के अगुवई म ये इलाका अब विकास के गूंज ले भर गए हे।
आखरी कोति टुनी म महिला के प्रतिमा ह बस्तर के स्त्री शक्ति अऊ सृजनशीलता के चिन्‍हारी प्रस्तुत करिस। ढोकरा शिल्पकला ले सजे झांकी ह बस्तर के कारीगर मन के प्रतिभा ल राष्ट्रीय मंच म चमकाइस।
छत्तीसगढ़ के झांकी ह ये संदेश दीस के नवा बस्तर अब परंपरा, प्रकृति अऊ प्रगति के संगम बन चुके हे — जेमां सड़क मन म स्कूल जात लइका, बिजली अऊ इंटरनेट के अंजोर अऊ आत्मनिर्भर महिला मन एक बदलत छत्तीसगढ़ के कहानी कहत हे।