सामुदायिक बाड़ी म खेती करके आर्थिक रूप ले सशक्त होवत हे समूह के महिला मन

कम लागत म मिरचा के खेती करके मिलीस अच्छा मुनाफा, होवत हे अकतहा आय

बलरामपुर, राज्य शासन के महत्वाकांक्षी नरवा, गरूवा, घुरूवा अऊ बाड़ी योजना के अंतरगत बाड़ी विकास म जिला के किसान अग्रसर होके खेती करत हें संगेच गौठान के सामुदायिक बाड़ी म खेती करके समूह के महिला मन अकतहा आय प्राप्त करत हें।

विकासखण्ड शंकरगढ़ के टिकनी गौठान के निराला अऊ गुलाब महिला स्व सहायता समूह के सदस्य मन गौठान के करीबन 1.50 एकड़ जमीन म मिरचा के खेती करत हें। खेती चालू करे के पहिली उद्यानिकी विभाग कोति ले अच्छा पैदावार बर जरूरी जानकारी इमन ल देहे गए रहिस। संगेच मिरचा के जेके 46 पान के प्रजाति लगाय के सुझाव देहे गीस। उद्यानिकी विभाग ले सुझाव पाके समूह के सदस्य मन समूह ले करजा लेके मिरचा के खेती करिन, जेमां गुलाब महिला स्व-सहायता समूह ल 12 हजार 840 रूपिया अऊ निराला स्व-सहायता समूह ल 7530 रूपिया के लागत लगाके मिरचा लगाए गीस। बने देखभाल अऊ उद्यान विभाग के अधिकारी मन के सलाह ल मानत बने फसल होइस, जेन ल बाजार म बेंचे म गुलाब स्व-सहायता समूह ल 92 हजार 980 रूपिया अऊ निराला स्व-सहायता समूह ल 86 हजार 830 रूपिया के मुनाफा होइस।