ग्रामीण मन ऊपर भालू करिन हमला, 5 के मउत, 2 घायल

कोरिया, 7 दिसम्बर 2020। कोरिया जिला के सोनहत क्षेत्र अंतर्गत ग्राम अंगावाही म जंगली भालू ह ग्रामीण मन ऊपर हमला कर दीस। एखर ले 4 लोगन के मउत होगे, उहें 3 गंभीर रूप ले घायल होगे। ​घायल मन ल इलाज बर जिला अस्पताल म भर्ती कराए गिस जिहां इलाज के बेरा 1 के मउत होगे। बतादन कि इतवार के संझा सोनहत क्षेत्र म पंडो बाहुल्य ग्राम अंगावाही म जंगली भालू ह जंगल गए  ग्रामीण मन ऊपर हमला कर देहे रिहिस। हमला म 4 लोगन के घटनास्थल म ही मउत होगे। उहें तीन गंभीर रूप ले घायल होगे। घायल मन ल इलाज बर जिला अस्पताल बैकुंठपुर म भर्ती कराए गिस। इलाज के बेरा एक के मउत होगे। मृतक मन म राजकुमारी उम्र 42 बछर निवासी ग्राम अगवाही, जोरिया भाई उम्र 60 बछर निवासी अंगवाही, फूल साय उम्र 65 बछर निवासी ग्राम मंगवा, शिव बचन उम्र 50 बछर निवासी ग्राम फुसला शामिल हे। मिले जानकारी के अनुसार वन विभाग ह इतवार के जंगली भालू के हमला के रेस्क्यू कार्य चलाए गिस। एमा चार शव बरामद करे गिस। उहें वन विभाग के टीम ह रेस्क्यू के दौरान एक मनखे के जान बचाईस। ए दौरान विधायक गुलाब कमरो, कलेकटर एसएन राठौर, पुलिस अधीक्षक चंद्र मोहन सिंह, डीएफओ अऊ अखिलेश मिश्रा वन अमला उपस्थित रिहिन।