- विधायक संग डीआईजी सीआरपीएफ अऊ कलेक्टर अउ एसपी ह हरी झंडी देखाके करिस बस ल रवाना
- अंदरूनी धुर नक्सली प्रभावित क्षेत्र के बड़का आबादी ल मिलही आवागमन सुविधा
बीजापुर, जिला के भैरमगढ़ अंतर्गत अंदरूनी क्षेत्र बेचापाल ले भोपालपटनम बर आज बस सेवा शुरू होइस। ये मौका म विधायक अउ उपाध्यक्ष बस्तर विकास प्राधिकरण श्री विक्रम मंडावी, डीआईजी सीआरपीएफ श्री कोमल सिंह, कलेक्टर श्री राजेन्द्र कुमार कटारा, पुलिस अधीक्षक श्री कमलोचन कश्यप अउ सीईओ जिला पंचायत श्री रवि साहू ह हरी झंडी देखाके बस ल रवाना करिस। उहें सबो मन ह गांव वाले मन के संग बस म सवार होके बेचापाल ले चेरली तक सफर करिन। ये बस सेवा शुरू होए ले अब धुर नक्सली प्रभावित क्षेत्र के एक बड़का आबादी ल तहसील मुख्यालय अऊ जिला मुख्यालय तक आवागमन सुविधा मिलही। ये दौरान मिरतुर ले भैरमगढ़ बाजार अवइया ग्रामीण सोमलू कड़ती, सुखराम माड़वी, दिलीप कड़ती, सुनीता माड़वी आदि ह बस म सवार होके खुशी व्यक्त करत कहिन कि एक निरधारित समय म बस चले ले आए-जाए के दिक्कत दूर होही। हाट-बाजार संग आन जगह म कृषि उपज, साग -सब्जी अऊ वनोपज विक्रय बर घलोक सुविधा होही। जिला प्रशासन ह ग्रामीण ईलाका ल जोड़े बर डीएमएफ मद ले क्रय करे गए ये बस के संचालन जनपद स्तरीय परिवहन समिति कोति ले करे जात हे। ये बस सेवा के शुरू होए ले मिरतुर ईलाका के गांव वाले मन ह प्रसन्न होके एला सराहनीय पहल निरूपित करिन। ये दौरान जनपद पंचायत अध्यक्ष श्री दशरथ कुंजाम संग आन पंचायत पदाधिकारी, पुलिस अउ सीआरपीएफ के अधिकारी अऊ सीईओ जनपद पंचायत श्री जेआर अरकरा, विकास विस्तार अधिकारी संग राजेन्द्र बालेंन्द्र अऊ मैदानी अधिकारी-कर्मचारी मौजूद रहिन।
