स्व-सहायता समूह अउ किसान उत्पादक कंपनी ले जुड़ के बढ़ाइस आय, आन महिला मन बर बनिस प्रेरणा
खैरागढ़-छुईखदान-गण्डई, जिला के विकासखण्ड छुईखदान के ग्राम कोहलाटोला के रहइया श्रीमती बेदो बाई वर्मा आज गाँव के महिला मन बर प्रेरणा के मिसाल बन चुके हे। स्व-सहायता समूह ले जुड़ के ओहा अपन आर्थिक स्थिति ला मजबूत करिस अउ आज “लखपति दीदी” के रूप म पहिचान बनावत हे।
श्रीमती बेदो बाई वर्मा, पति श्री दीपक वर्मा, बछर 2018 म ‘जय नथेला मईया स्व-सहायता समूह’ ले जुड़िस, जो फुलवारी ग्राम संगठन के तहत काम करत हे अउ विद्या संकुल संगठन, छुईखदान ले जुड़े हे। समूह ले जुड़े के पहिली ओखर आर्थिक स्थिति कोनो जादा मजबूत नइ रहिस अउ परिवार के आय ह खास करके खेती-किसानी ऊपर ही भरोसा म रहिस।
‘बिहान’ योजना ले जुड़े के बाद ओहा समूह ले करजा लेके खेती के काम ला आगू बढ़ाइस अउ नवा मउका मन के खोज सुरू करिस। बछर 2021 म ओहा स्वर्ण-उपज महिला किसान उत्पादक कंपनी (FPO) म शेयरधारक के रूप म जुड़ के एक ठन नवा पहल करिस। अपन मिहनत अउ अगुवाई करे के ताकत ले ओहा लगभग 950 महिला किसान मन ला घलो ए कंपनी ले जोड़े म बड़ भूमिका निभाइस।
एखर बाद ओला FPO के खरीदी केंद्र संचालिका के रूप म काम करे के मउका मिलिस। ए काम बर ओला वाइब्रो मशीन, वजन के मशीन, टैबलेट अउ आन जरूरी सामान मन ला दे गिस। ओहा किसान मन ले चना, सोयाबीन, मूंग अउ अरहर ला बाजार भाव म बिसाथे, जेखर ले ओला कमीशन के रूप म आय मिलथे। अब तक ए काम ले ओला लगभग 2 लाख रूपया के कमीशन मिल चुके हे।
एखर अलावा ओहा अपन गाँव म किराना दुकान घलो चलाथे, जेखर ले हर महीना लगभग 3000 रूपया के आय होथे। संगे-संग ओहा धान, सोयाबीन अउ चना के खेती घलो करथे अउ घर बर जैविक सब्जी घलो उगाथे।
अलग-अलग काम मन के माधयम ले श्रीमती बेदो बाई वर्मा के आय ह सरलग बाढ़त हे। ओला खेती ले लगभग 1 लाख 50 हजार रूपया, खरीदी केंद्र संचालिका के रूप म लगभग 40 हजार रूपया, किराना दुकान ले करीब 36 हजार रूपया, जैविक दवाई बेचे ले लगभग 12 हजार रूपया, कृषि सखी के मानदेय के रूप म लगभग 23 हजार रूपया अउ मास्टर ट्रेनर मानदेय के रूप म करीब 5 हजार रूपया के आय मिलथे। ए सब्बो जरिया ले ओखर कुल सालाना आय ह लगभग 2 लाख 66 हजार रूपया तक पहुँच चुके हे।
अवइया बखत म श्रीमती बेदो बाई वर्मा ह कुकरा पालन (मुर्गी पालन) के काम घलो सुरू करे के योजना बनावत हे, जेखर ले ओखर आय अउ बाढ़ही। अपन मिहनत, लगन अउ आत्मविश्वास के दम म ओहा न सिर्फ अपन परिवार के आर्थिक स्थिति ला मजबूत करत हे, बल्कि इलाका के आन महिला मन ला घलो आत्मनिर्भर बने बर प्रेरित करत हे।
