बिहान कैफेटेरिया संचालन करके आर्थिक रूप ले सजोर होवत हें समूह के महिला मन

महासमुंद, शासन के महत्वपूर्ण योजना मन म ले एक बिहान योजना ले जिला के ग्रामीण अंचल म महिला सशक्तीकरण बर महिला मन ल समूह ले जोड़के पारम्परिक गतिविधि मन के अलावा आन रोजगार मूलक गतिविधि ले जुड़े बर प्रेरित करे जात हे। इही कड़ी म विकासखण्ड महासमुन्द के जय मां चण्डी महिला स्व-सहायता समूह, ग्राम खैरा के सदस्य मन आजीविका गतिविधि के रूप म बिहान कैफेटेरिया के शुरूआत अगस्त 2021 ले करे हें।
समूह के सदस्य मन के बताती साल जनवरी 2021 म जय मां चण्डी महिला स्व-सहायता समूह ग्राम-खैरा के गठन छ.ग. राज्य ग्रामीण आजीविका मिशन “बिहान” के तहत् करे गीस। जेमां समूह सदस्य मन आपसी बचत के माध्यम ले अउ योजना ले सामुदायिक निवेश कोष के राशि ल मिलाके बिहान कैफेटेरिया के संचालन जिला पंचायत कार्यालय महासमुन्द म चाय, नास्ता, छत्तीसगढ़ी व्यंजन, भोजन आदि बनाए के काम चालू करिन। जिला पंचायत महासमुन्द कार्यालय म रोजे अवइया आम-जनता, शासकीय अधिकारी-कर्मचारी ल खाए के जिनिस बिहान कैफेटेरिया के माध्यम ले उपलब्‍ध कराए जात हे। बिहान कैफेटेरिया के आस-पास आन शासकीय कार्यालय जइसे-जिला अउ सत्र न्यायालय, महिला अउ बाल विकास विभाग, पुलिस अधीक्षक कार्यालय, कलेक्टर कार्यालय संग आन अधिकारी-कर्मचारी घलोक बिहान कैफेटेरिया म आके विशेषतः छत्तीसगढ़ी व्यंजन के आनंद लेवत हें। जेमे चीला, फरा, ठेठरी, खुर्मी, अईरसा, सलौनी, मूंग/उडदबड़ा, साबुदाना बड़ा आदि सामिल हे। एखर अकतहा जिला कार्यालय म आयोजित होवइया बैठक, कार्यशाला, प्रशिक्षण आदि म चाय, नाश्ता अउ भोजन के आर्डर तको बिहान कैफेटेरिया ल मिलत हे।
बिहान कैफेटेरिया के संचालक जय मां चण्डी महिला स्व-सहायता समूह के अध्यक्ष श्रीमती राधा साहू ह बताइस कि करीबन एक साल ले संचालित बिहान कैफेटेरिया के माध्यम ले समूह ह करीबन पांच लाख रुपए तक के विक्रय करे हे। जेखर से सदस्य मन ल आर्थिक रूप ले अपन परिवार ल सहयोग करे के अवसर प्राप्त होए हे। बिहान योजना के माध्यम ले अउ जिला पंचायत महासमुन्द कार्यालय कोति ले बिहान कैफेटेरिया के संचालन बर भवन, बिजली अउ फर्नीचर के व्यवस्था करे गए हे।