प्रधानमंत्री आवास योजना ग्रामीण: आर्थिक रूप ले कमजोर वर्ग के मनखे मन ल मिलत हे खुद के पक्का मकान

बेमेतरा, प्रधानमंत्री आवास योजना ग्रामीण के माध्यम ले सरकार कोति ले ग्रामीण क्षेत्र मन म रहइया आर्थिक रूप ले कमजोर वर्ग के मनखे मन ल खुद के पक्का मकान बनाए बर अऊ जुन्ना घर के मरम्मत बर आर्थिक सहायता देहे जात हे। एखर संगेच ओ मन ल पक्का शौचालय बनाए म घलोक मदद करे जात हे। देश-प्रदेश के ग्रामीण इलाका मन म आज घलोक लाखों परिवार कच्चा मकान म रहिथें। गांव म रहइया मनखे गरीबी के सेती अपन पक्का मकान नइ बना पावयं। ओ मन अपन खुद के पक्का घर बनाना चाहथें फेर आर्थिक स्थिति कमजोर होए के सेती ओ मन अपन पक्का मकान के सपना पूरा नइ कर पावयं अऊ पूरा जिंदगी कच्चा मकान म बिता देथें। ऊंखर इही सपना ल पूरा करे के उद्देश्य ले सरकार कोति ले ग्रामीण इलाका मन म रहे बर प्रधानमंत्री ग्रामीण आवास योजना चलाए जात हे।
हम बात करत हन एक गरीब परिवार के जेखर प्रधानमंत्री आवास योजना ले पक्का मकान के सपना साकार होय हे, जेन विकासखण्ड बेमेतरा ले करीबन 35 कि.मी. दूर ग्राम उड़तला म रहिथे। उड़तला एक छोटकुन गांव ये, जेन ग्राम पंचायत मजगांव के आश्रित ग्राम ये। ग्राम उड़तला म रामाधार नाम के एक गरीब मनखे रहिथे, जेन गांव म मवेसी चराए के काम करत जुन्ना टूटे-फूटे जर्जर खपरैल वाला कच्चा घर म अपन परिवार के संग जीवन यापन करत रहिस। रामाधार ह बताइस कि कच्चा मकान म जीवन गुजारना मजबूरी बन गए रहिस। ये मकान म कभू बारिश त कभू तुफान, जहरीला जीव-जन्तु के खतरा अऊ मकान ढहे के खतरा बने रहत रहिस। वोकर बताती गांव वाले मन ओला अवास योजना के बारे म बताईन, जेखर बाद वो ह घर बर आवेदन करिस अऊ वित्तीय साल 2019-20 म घर निर्माण बर ओला स्वीकृति प्रदाय करे गीस। आज वोकर घर बनके तियार हो गए हे। पीएम आवास योजना ह मोर पक्का मकान के सपना ल पूरा करिस।