ऊर्जीकृत पंप मन ल निर्बाध बिजली आपूर्ति देहे बर विभाग तत्परता ले करत हे काम
बेमेतरा, 11 अगस्त 2020। शासन के रीति-नीति के मुताबिक नवा कृषि पंप मन के ऊर्जीकरण जल्दी ले जल्दी करे अऊ ऊर्जीकृत पंप मन ल निर्बाध बिजली आपूर्ति देहे बर विभाग तत्परता ले काम करत हे। इही तारतम्य म छत्तीसगढ़ स्टेट पॉवर डिस्ट्रीब्यूशन कंपनी लिमिटेड, दुर्ग क्षेत्र के विभागीय संभाग साजा के अंतर्गत वित्तीय साल 2020-21 के अंतर्गत 77 किसान मन के पंप ऊर्जीकृत करे गए हे। जेमा ग्राम बुंदेली, मुड़िया, चोरभट्ठी, बिरनपुर, मुनगाटोला, देवरबीजा, राखी, गाड़ाडीह, बोरतरा, कुम्हीगुड़ा, सोहागपुर, देउरगांव, बुधवारा, परसबोड़, सिघनपुरी, अम्लीडीह, करही, लालपुर, कुसमी, सांकरा, कोटा, खर्रा, बोरिया, भिम्भौरी, करेली, तारालीम, बहेरा, बोरसी आदि सामिल हे।
ग्राम परपोड़ी के किसान श्री जगतराम पाल ह बताइस के पहिली अल्प वर्षा, खण्ड वर्षा, सूखा अऊ अकाल जइसे समस्या मन के सेती खेती-किसानी उपर बहुत नुकसान होत रहिस ए खातिर हमन अपन खेत म बोर खोदवाके पंप बर स्थायी विद्युत कनेक्शन बर आवेदन करिस। विद्युत कंपनी के सजगता ले पंप कनेक्शन मिल गीस अऊ वोल्टेज घलोक सही तरीका ले मिले लगिस। वो ह बताइस के अब सूखा के चिंता ले मुक्त होके खेत मन म दोहरी फसल घलोक ले सकत हे। राज्य शासन के आभार व्यक्त करत ग्राम राखी के किसान श्री मानाराम यादव कहिस के बिजली अऊ पानी के उचित व्यवस्था हो जाय के सेती अब धान के अलावा आन फसल घलोक उबजा सकबोन, एखर से किसान आर्थिक रुप ले घलोक समृद्ध होही। पंप कनेक्शन मिल जाय ले निश्चित रुप ले खेती-किसानी म फायदा होही।
छत्तीसगढ़ स्टेट पॉवर डिस्ट्रीब्यूशन कंपनी लिमिटेड, दुर्ग क्षेत्र के कार्यपालक निदेशक श्री संजय पटेल ह कहिन के कृषक हितैषी योजना मन के क्रियान्वयन विद्युत विभाग कोति ले पूरा सजगता ले करे जात हे। उमन कहिन के बांचें आवेदक किसान मन के पंप ऊर्जीकरण के काम घलोक प्रगतिरत हे, जेखर से किसान मन ल कृषि काम बर भरपूर पानी मिल सकय।
