मोर जमीन मोर मकान : देवलाल के मकान के सपना होइस साकार

बेमेतरा, 11 जनवरी 2021। मोर जमीन मोर मकान के पीएम गृह योजना ले देवलाल के सपना साकार होए हे। महल होवय या झोपड़ी अपन घर अपनेच होथे, हर मनखे के एक सपना होथे के छांव बर ओखर एक खुद के घर होवय। खुद के घर होए ले कई फायदा हे, अपन घर मनखे ल वित्तीय सुरक्षा देथे। एक घर ल अपन घर कहे म जऊन गौरव के अनुभूति होथे, इही सपना ल सरकार ह साकार करत हे। इही कड़ी म अनुसुचित जाति वर्ग के करीबन 55 साल के देवलाल सीवारे अब खुद के पक्का मकान पा के सुकुन के नींद लेवत हे। प्रधानमंत्री आवास योजना (शहरी) गरीब परिवार मन बर लाभकारी सिद्ध होवत हे। शासन के ये महती योजना ले लाभान्वित नगर पचायत बेरला के वार्ड क्र.04 बेरला निवासी भूमिहीन देवलाल के पक्का मकान के सपना प्रधानमंत्री आवास योजना ले साकार होए हे। शासन के ये योजना ले लाभ पाके देवलाल बहुत खुश हे।
जानबा हे कि मेहनत मजदूरी ले जीवन यापन करइया ये परिवार पहिली खपरा के कच्चा घर म रहत रहिस। ये परिवार के सदस्य मन ह कभू सपना म घलोक नइ सोचे रहिस के ओखर खुद के एक पक्का मकान होही। अब ओखर सपना प्रधानमंत्री आवास योजना (शहरी) के सेती हकीकत बन गए हे। मिट्टी अऊ खपरा के छत वाले मकान म रहइया देवलाल अब सीमेंट कांक्रीट के छत वाले मकान के मालिक बन गए हे। सरकार ले घर बनाए बर ओ ल 02 लाख 29 हजार रुपए के राशि स्वीकृत करे गए रहिस। वोखर घर म शौचालय घलोक बन गए हे। वो ह केन्द्र अऊ राज्य शासन के ये महती योजना के बारे म बतात कहिस के हम जइसे गरीब परिवार के मनखे मन बर ये योजना अड़बड़ सहारा बन के आए हे, जेखर सेती हमला पक्का मकान दे गए हे। देवलाल कुर्रे ह नगर पंचायत अध्यक्ष बेरला श्री रासबिहारी कुर्रे, उपाध्यक्ष श्री भारत भूषण साहू अऊ जिला प्रशासन के प्रति प्रधानमंत्री आवास योजना अंतर्गत पक्का घर के लाभ मिले म आभार व्यक्त करे हे।