मनरेगा म जिला के 52 हजार मजदूर मन ल देहे गीस काम

बेमेतरा, 16 फरवरी 2021। देश म कोरोना महामारी के प्रकोप के समय जब लॉकडाउन लगाए गए रहिस त महात्मा गांधी नरेगा के माध्यम ले ही गांव के मजदूर मन ल रोजगार के साधन मुहैया करात जिला के हजारों श्रमिक मन ल काम दे गीस। जेमां महात्मा गांधी नरेगा अंतर्गत हितग्राही मूलक अउ आजीविका ले संबंधित काम कराये गये हे। जेमां तालाब गहरीकरण, डबरी निर्माण, पंचायत भवन, आंगनबाड़ी, जल संरक्षण अउ सिंचाई नाली आदि हे। कलेक्टर अउ महात्मा गांधी नरेगा के जिला समन्वयक श्री शिव अनंत तायल के मार्गदर्शन अउ जिला पंचायत सीईओ श्रीमती रीता यादव के नेतृत्व मे जिला मे 649 काम मन म कुल 52231 मजदूर काम करत हें।
गांव के किसान अउ मजदूर खेती-किसानी अउ धान के फसल काम ले निवृत्त होके मनरेगा के काम म पहुंचत हें। 10 फरवरी 2021 के स्थिति म जिला के चारो जनपद पंचायत क्रमशः बेमेतरा, नवागढ़, साजा, बेरला के कुल 429 ग्राम पंचायत मन के 328 ग्राम पंचायत मन म 649 काम म कुल 52231 मजदूर काम करत हें। जेमां जनपद पंचायत बेमेतरा के 110 ग्राम पंचायत म ले 93 ग्राम पंचायत म 12774, नवागढ़ के 111 ग्राम पंचायत मन म ले 83 ग्राम पंचायत म 14539, साजा म 106 ग्राम पंचायत मन म 85 ग्राम पंचायत म 13136 अउ बेरला के 102 ग्राम पंचायत मन म ले 67 ग्राम पंचायत म 11782 मजदूर काम करत हें।
जेमां मुख्यतः पंचायत भवन निर्माण, जल सरंक्षण, नवा तालाब गहरीकरण, डबरी निर्माण, मेढ़ बधांन, नरवा बंधान आदि के काम करे जात हे। जिला प्रशासन के उद्देश्य हे कि स्थानीय मजदूर मन ल ऊंखर गांव म ही रोजगार मिलय अऊ ओ मन ल काम बर अनावश्यक झन भटकना परय। एखर बर मनरेगा के माध्यम ले जादा ले जादा काम स्वीकृत करे जात हे।