वजन त्यौहार म पालक मन लेवत हें विशेष रुचि

बेमेतरा 13 जुलाई 2021। जिला म 05 साल ले कम उम्‍मर के लइका मन म पोषण स्तर के आंकलन बर 16 जुलाई तक सबो आंगनबाड़ी केन्द्र मन म वजन त्यौहार के आयोजन करे जात हे। महिला अऊ बाल विकास विभाग कोति ले पहिली के साल जइसे आयोजित वजन त्यौहार कस ये साल घलोक आंगनबाड़ी केन्द्र मन म आंगनवाड़ी कार्यकर्ता मन इलेक्ट्रॉनिक मशीन ले लइका मन के वजन लेवत हें। वजन त्यौहार म किशोरी बालिका मन के हीमोग्लोबिन टेस्ट कराए के संगेच उंखर बीएमआई घलोक ज्ञात करे जात हे। एखर बर आंगनवाड़ी केन्द्र म अवइया 11 ले 18 साल के सबो किशोरी बालिका मन ल ये अभियान म सामिल करके स्वास्थ्य विभाग के संग समन्वय ले टेस्ट कराए जाही। एखर से किशोरी मन म एनीमिया के स्तर पता करके ओखर नियंत्रण म मदद मिलही। वजन त्यौहार म जनप्रतिनिधि अऊ समुदाय के सक्रिय सहभागिता घलोक लेहे जाही।
वजन त्यौहार म पालक मन तको विशेष रुचि लेवत हें, इही कड़ी म परियोजना नांदघाट के अन्तर्गत सेक्टर कुंरा के आंगनबाड़ी केन्द्र करहीकांपा, रोहरा, पौंसरी, मनोधरपुर, खपरी, गिधवा, नगधा म वजन त्यौहार के समय 0 ले 5 साल के लइका मन के वजन, ऊंचाई, लम्बाई के माप करके कुपोषण स्तर के पता लगाए गीस। करहीकांपा अऊ रोहरा म युनिसेफ टीम ह निरीक्षण करिस। डॉ. छबीलाल साहू ह 10 लइका मन के वजन, ऊंचाई के सत्यापन करिस। सात आंगनबाड़ी केन्द्र मन के 369 लइका मन के वजन नापे गीस। जेमां सबो लइका मन समान्य श्रेणी मे पाए गीस। ग्राम नगधा आंगनबाड़ी केन्द्र म एक लइका मध्यम कुपोषित पाए गीस, लइका मन के मां ल संतुलित आहार खाए के समझाईश देहे गीस। संगेच गरम भोजन रेडी-टू-ईट के आहार नियमित रुप ले देहे ल कहे गीस। परियोजना अधिकारी नांदघाट शिल्पा तिवारी अऊ सुपरवाईजर रानू मिश्रा ह लइका मन के माता ल उचित देखभाल करे के सलाह दीन।