बेमेतरा, 28 दिसम्बर 2020। प्रदेश सरकार के फ्लैगशिप योजना नरवा, गरवा, घुरवा अउ बाड़ी योजना के उत्साह जनक
परिणाम आगू आवत हे। गोधन न्याय योजना ले पशुपालक मन म नवा आशा के संचार होए हे। गोधन न्याय योजना के कहानी, गोबर बेचइया के जुबानी सुनव-
मोर नाव परमेश्वर यादव हजे, मैं ग्राम मोहतरा, विकास खण्ड -नवागढ़, जिला -बेमेतरा के रहवईया आंव। मोर काम-धाम गरूवा पालना अऊ गांव वाले मन के गाय ल चराके अपन अऊ अपन परिवार के जीवन यापन कराना हे। एकर से वइसे तो गुजर-बसर चलत रहिस फेर मोर तीर वोतका पइसा सकलावत नइ रहिस के अपन छोट-छोट सउंख ल पूरा कर सकवं, काबर के गाय चराए ले मिले मेहनताना ले दैनिक उपयोग के सामान अऊ परिवार के भरण-पोषण भर सम्भव रहिस।
हरेली तिहार 20 जुलाई 2020 के मुख्यमंत्री दाऊ श्री भूपेश बघेल ह गोधन न्याय योजना के शुरुआत करीस, जऊन मोर अऊ हमार जइसे गौपालक संगी मन के जीवन म एक नवा अंजोर लेके आइस काबर के हमार तिर अकतहा आय के साधन नइ रहिस अऊ बरसात अऊ आन समय म गोबर ले नहीं के बरोबर आमदनी होत रहिस, गोधन न्याय योजना के अंतर्गत सरकार ह जब दू रूपिया किलो गोबर ल बिसाना चालू करिस त 20 जुलाई 2020 ले 23 नवम्बर 2020 तक मैं ह 28476 किलो गोबर बेंचेव जेकर से मोला 56952 रुपिया मिलिस। मोर अऊ मोर परिवार के बरसो के सपना रहिस के अपन मोटर साईकिल होतिस, ते ये पाए पईसा के सहयोग अऊ वोमें अऊ पइसा मिलाके हम वोला अब बिसा पायेन। जे ह मोर अऊ मोर परिवार बर कोनो बड़का तिहार ले कम नइ हे।
मोर अलावा आन संगी मन ल घलोक गोधन न्याय योजना ले बहुतेच सहयोग मिलत हे, जेमे पोसन ल करीबन 26000 रुपिया, रीतेश ल करीबन 55000 रुपिया, मनहरण ल करीबन 15000 रुपिया, संतोष ल 5000 रुपिया अऊ आन मन ल पइसा मिलत हे। गौ पालक मन ह छत्तीसगढ़ के मुखिया श्री भूपेश बघेल ल गोधन न्याय योजना सुरू करे बर हृदय ले धन्यवाद ज्ञापित करत हें।
