बेमेतरा, 29 अप्रैल 2024। जिला के कठिया गाँव तीर एक बड़का सड़क हादसा होए हे जेमा के घायल मन रायपुर एम्स म भर्ती कराए गए हे। हादसा के सूचना जइसनहेच बेमेतरा विधायक दीपेश साहू ल मिलीस वो अपन समर्थक मन के संग अस्पताल पहुंचिन अऊ घायल मन ले भेंट करके प्रशासन से गोठ बात करके एम्स म इंकर बेहतर इलाज बर भेजिन।
जानबा हे कि जिला के कठिया गाँव म होए हृदय विदारक सड़क हादसा म सरग सिधारे मनखे मन के संख्या 10 तक जा पहुंचे हे। बांचे घायल मन ल अस्पताल म दाखिल कराए गए हे जिहां उंखर इलाज जारी हे। घटना के बाद जिला के कलेक्टर अऊ एसपी मौका म पहुँच गए रहिन। उमन खुदे राहत काम के जायजा लीन अऊ दुर्घटनाग्रस्त वाहन ल सड़क ले हटाए के निर्देश दीन। जानबा हे के देर रात पारिवारिक कार्यक्रम ले लहुटत पिकअप वाहन सड़क किनारे खड़े एक स्वराज माजदा ले जा टकराईस। ये टक्कर अतका भीषण रहिस कि आधा दर्जन सवार के मौकेच म मौत हो गे। सरग सिधारे मनखे मन म ज्यादातर महिला अऊ लइका सामिल हे। पिकअप म करीब 30 मनखे सवार रहिन जेन एक छठी कार्यक्रम म सामिल होके वापस पथर्रा गांव लहुटत रहिन।