गोधन न्याय योजना के हितग्राही मन ल मिलत हे खुसी, अब पइसा के नइ सतावय हे चिंता, गोबर बेंच के करत हें सपना ल सकार
गोधन न्याय योजना म अब तक 283.10 करोड़ रूपिया के हो गए हे भुगतान, गौठान मन ले जुड़े महिला समूह मन ल होए हे 72.19 करोड़ रूपिया के कमई
बैकुण्ठपुर, भर्रा के रहइया मीनल के एक सपना रहिस के ओखर खुद के एक घर होतिस, फेर ये सपना पूराच नइ होत रहिस। मीनल तीर अतका पईसा नइ रहिस कि वो अपन बर घर बनावय। मीनल ह गांव म दूसर के घर के भिथिया ल मजबूत करे बर अक्सर वोकर उपर गोबर के पोताई करत रहिस, फेर आज इही गोबर ल बेंच के मीनल ह अपन बर मजबूत घर बना लेहे हे। गोधन न्याय योजना के मदद ले मीनल ह 140 कुंटल गोबर बेचके 28 हजार रूपिया कमाइस अऊ गोबर ले 500 कुंटल वर्मी कंपोस्ट खाद बना के बेचे ले 5 लाख रूपिया के आय अर्जित करे हे। मीनल के आगू बढ़त पांव अभी थमे नइ हे अऊ वो ये योजना के जादा ले जादा लाभ उठाना चाहत हे।
छत्तीसगढ़ के मुख्यमंत्री श्री भूपेश बघेल कोति ले शुरू करे गए गोधन न्याय योजना के ये कहानी सिरिफ मीनल के ही नइ हे, छत्तीसगढ़ म गोधन न्याय योजना के शुरू होए के बाद ले अइसन कई जीवंत उदाहरण आगू आए हे जेमां गोबर बेंचके मनखे मन ह अपन सपना ल साकार करे हें। कोनो ह गोबर बेचके मोबाइल बिसाए हें, कोनो ह मोटरसायकिल, कोनो ह गहना त कोनो ह अपन बेटी के शादी करे हें।
मुख्यमंत्री कोति ले ये योजना के शुरू करे के पीछू के उद्देश्य पशुपालक मन के आय म वृद्धि, पशुधन के खुला चरई म रोक लगाके फसल के सुरक्षा, द्विफसली क्षेत्र के विस्तार करना, जैविक खाद के उपयोग ल बढ़ावा देना, स्थानीय मनखे मन ल रोजगार के अवसर प्रदान करना, जमीन के उर्वरता म सुधार करना अऊ सुपोषण ल बढ़ावा देना हे। छत्तीसगढ़ सरकार के गोधन न्याय योजना पूरा देश म लोकप्रिय योजना के रूप ले लेहे हे जेला भारत सरकार ह घलोक सहराए हे। ये योजना ले ग्रामीण अऊ शहरी इलाका मन म गौ पालक मन ल आमदनी के अकतहा जरिया मिले हे।
गोधन न्याय योजना देश दुनिया के इकलउता अइसे योजना हे जेखर तहत छत्तीसगढ़ राज्य के गौठान मन म दू रूपिया किलो के दर ले गोबर के खरीदी करे जात हे। गौठान मन म 15 जून तक खरीदे गए गोबर के एवज म गोबर बेचइया गांव वाले मन ल 147.06 करोड़ रूपिया के भुगतान घलोक करे जा चुके हे। गौठान समिति अऊ महिला स्व सहायता समूह मन ल अब तक 136.04 करोड़ रूपिया के राशि के भुगतान करे जा चुके हे।
गौठान मन म महिला समूह मन कोति ले गोधन न्याय योजना के अंतर्गत क्रय गोबर ले बड़का पैमाना म वर्मी कंपोस्ट, सुपर कंपोस्ट अऊ सुपर कंपोस्ट प्लस खाद के निर्माण करे जात हे। गौठान मन म महिला स्वसहायता समूह मन आन आयमूलक गतिविधि मन के घलोक संचालन करत हें जेखर से महिला समूह मन ल अब तक 72.19 करोड़ रूपिया के आय होए हे। राज्य म अब तक गौठान मन ले 13,969 महिला स्वसहायता समूह सीधा जुड़े हें जिंकर सदस्य संख्या 82,874 हे।
