आंगन म लगाइन कटहल अऊ अमरुद के पौधा
रायपुर, 05 अगस्त 2024। राजस्व अउ आपदा प्रबंधन मंत्री श्री टंकराम वर्मा हरेली तिहार के पावन अवसर म विकासखंड बलौदाबाजार के ग्राम सकरी म प्रधानमंत्री ग्रामीण आवास योजना के हितग्राही मन ल नवनिर्मित आवास के फीता काटके गृह प्रवेश कराइन। उमन प्रधानमंत्री आवास योजना के तहत सुंदर मकान बनाए म गिरजाशंकर अउ ओखर परिवार ल शुभकामना दीन। उमन नवनिर्मित मकान के आंगन म कटहल अऊ अमरुद के पेड़ लगाइन। ए अवसर म पूर्व विधानसभा अध्यक्ष श्री गौरीशंकर अग्रवाल, पूर्व संसदीय सचिव डॉ सनम जांगड़े, कलेक्टर श्री दीपक सोनी, सीईओ जिला पंचायत सुश्री दिव्या अग्रवाल उपस्थित रहिन।
पेशा ले राज मिस्त्री हितग्राही गिरजाशंकर ह बताइस कि पहिली कच्चा मकान रहिस। जेमां कई प्रकार के परेशानी के सामना करना परत रहिस। पक्का मकान के सपना रहिस, फेर आर्थिक स्थिति ठीक नइ होए के सेती हिम्मत नइ जुटा पात रहिस। इही बीच साल 2020- 21 म प्रधानमंत्री ग्रामीण आवास योजना अंतर्गत आवास पास होइस। पहली किश्त मिले म मकान बनाना शुरू करिस, तीन किश्त म कुल एक लाख बीस हजार रुपिया मिलिस। वो बताइस के कुछ अपन पैसा लगाके आवास ल थोड़ा बड़का बना लय। गिरजाशंकर ह बताइस कि वोखर पत्नी श्रीमती बुद्धेश्वरी वर्मा ल महतारी वंदन योजना के तहत हर महिना एक हजार रूपिया मिलत हे। प्रधानमंत्री उज्जवला योजना के घलोक लाभ मिले हे।
मंत्री श्री वर्मा ह ग्राम सकरी के अमृत सरोवर म जय माँ अन्नपूर्णा स्व-सहायता समूह के महिला मन कोति ले मछली पालन के शुरुआत सरोवर म मछली बीज डालके करिस। उमन मछली पालन ल लाभ के व्यवसाय बतात महिला मन ल बेहतर ढंग ले मछली पालन करे ल कहिन। महिला मन ह बताइन कि ओ मन ए सरोवर म पहली पइत मछली पालन करइया हें। मछली पालन विभाग कोति ले अभी 65- 70 नग रोहु, कतला अऊ मृगल मछली प्रतिकात्मक रूप ले देहे गए हे। कुछ दिन बाद विभाग कोति ले करीब 5000 मछली बीज़ (फिंगर लिंग) दे जाही।