रायपुर, 02 अप्रेल 2020। कोरोना संकट के तहत प्रधानमंत्री गरीब कल्याण पेकेज योजना के तहत गरीब महिला लाभार्थि मन के जनधन योजना खाता म पइसा सीधा जमा होही। योजना के तहत 26 मार्च ले अवइया तीन महिना तक हर एक महिना पांच-पांच सौ रूपिया जमा होही। ये संबंध म भारत सरकार के वित्त मंत्रालय कोति ले भारतीय स्टेट बैंक के चेयरमेन अऊ पब्लिक सेक्टर अऊ मेजर प्राईवेट सेक्टर बैंक के प्रबंध संचालक अऊ मुख्य कार्यपालन अधिकारी मन ल अपन अधिकार के सबो बैंक शाखा मन अऊ संबंधित व्यवसाय करेसपांउडेंट (बी.से.) अऊ ए.टी.एम. के माध्यम ले पइसा वितरण के समुचित व्यवस्था बनाए के हुकुम देहे गए हे। सबो बैंक मन म कोरोना वायरस के संक्रमण ले बचाव बर हितग्राही मन म सोशल डिस्टेंसिंग के पालन करे के हुकुम देहे गए हे।
गरीब कल्याण पेकेज के हितग्राही महिला मन, अपन जनधन खाता के नंबर के आखरी नंबर (लास्ट डिजिट) के आधार म निरधारित तिथि मन म बैंक के शाखा मन म उपस्थित होके भुगतान प्राप्त कर सकहीं, जेमां जनधन खाता धारक महिला हितग्राही जिंकर खाता के आखरी नंबर 0 ले 1 हे ओ मन 3 अप्रेल के, आखरी म जिंखर 2 ले 3 तक हे उनला 4 अप्रेल के, 4 ले 5 तक हे उनला 7 अप्रेल के, 6 ले 7 तक हे उनला 8 अप्रेल के अऊ 8 ले 9 आखरी नंबर वाले जनधन खाता धारक महिला मन ल 9 अप्रेल के भुगतान मिलही। 9 अप्रेल के बाद हितग्राही नार्मल बैंकिंग समय म प्रधानमंत्री गरीब कल्याण पेकेज के तहत भुगतान प्राप्त कर सकहीं। भुगतान के समय सोशल डिस्टेंसिग के पालन करना जरूरी होही।
