गुरतुर गोठ, खजूर जेला छत्तीसगढ़ म पेनखजूर तको कथें ये मीठ फल होथे, जेन ल खाए ले शरीर ल कई प्रकार के लाभ होथे। एकर उपयोग कई मनखे सक्कर के रूप म घलोक करथें। फाइबर वाला ए फल ल खाए ले कई बीमारी मन ले लडे़ म घलोक मदद मिलथे। रोजे भिनसरहा सबले पहिली दू-तीन खजूर के सेवन करना चाही अउ मंझनिया के नाश्ता के रूप म घलोक खाना चाही। ये चीनी (सक्कर) के क्रेविंग ल खतम करे के एक शानदार विकल्प हे।
एला पानी म भिंजो के खावव
खजूर ल पानी म भिगो के रखे के बाद वोला खाए म खजूर ले वोमा मौजूद टैनिन या फाइटिक एसिड निकल जाथे। भिंजोए ले हमार पेट ह एखर पोषक तत्व ल आसानी ले अवशोषित कर लेथे। भिगोए खजूर ल खाए ले ओ ल पचाना घलोक आसान हो जाथे। कहूं आप मन खजूर के सुग्घर सुवाद लेना चाहत हव अऊ वोखर पोषक तत्व मन ल घलोक हासिल करना चाहत हव त खाए के पहिली रात म 8-10 घंटा बर एला भिगोके रख देवव।
खजूर म कई प्रकार के पोषक तत्व होथे, जइसे- कार्बोहाइड्रेट, प्रोटीन, फाइबर, विटामिन सी, विटामिन बी , पोटेशियम, मैग्नीशियम, आयरन, कैल्शियम, मैंगनीज, जिंक आदि। ये सबो पोषक तत्व हमला कई रोग ले बचाय के काम करथे।
आवव जानथन के खजूर खाए ले शरीर ल का-का फायदा मिलथे:-
1. रोजाना खजूर खाए ले आप मन ल कब्ज ले राहत मिलही।
2. बढ़े कोलेस्ट्रॉल ल कम करे म मदद मिलही।
3. ब्लड प्रेशर कंट्रोल म रहिही।
4. हाड़ा मजबूत रइही।
5. मस्तिष्क (मगज) के काम म तेजी आही मने दिमाग तेज काम करही।
6. थकान अऊ कमजोरी ले छुटकारा मिलही।
7. एनीमिया के रोगी मन बर फायदेमंद हे।
8. बवासीर के समस्या ल खतम करे म मददगार हे।
9. चमड़ी अऊ चूंदी बर घलोक बहुत फायदेमंद हे।
10. शारीरिक ताकत अऊ स्टेमिना बढ़ाय म मददगार।
11. हिरदे ल ताकतवर रखथे।
