एके सीजन म आलू के खेती ले कमाइन 1 लाख 40 हजार
जशपुर, जिला के जय भवानी स्व-सहायता समूह के महिला मन आलू के खेती करत हें। आलू के खेती ले उमन ल एके सीजन म 1 लाख 40 हजार रुपए के आमदनी होए हे। एकर से महिला मन ल घलोक लगे लगे हे कि अवइया समय म आलू के खेती ऊंखर बर फायदा के सौदा साबित हो सकत हे।
जानबा के मुताबिक बगीचा विकासखंड के सुलेसा गौठान के जय भवानी स्व-सहायता समूह के महिला मन ल प्रशासन के माध्यम ले आलू के खेती बर वैज्ञानिक सलाह के संग वित्तीय अउ आन सहायता मिलीस। एखर बाद समूह के महिला मन ह आलू के खेती करे के फैसला करिन। गौठान के चार एकड़ बाड़ी म करीबन 10 कुंटल बरसाती आलू के खेती उमन सुरू करिन। आलू के फसल होए के बाद वोला मण्डी म थोक विक्रेता मन तीर बेंचिन त तुरंत पैसा घलोक मिल गए। समूह ल ये खेती ले सीजन मुताबिक 1 लाख 40 हजार रुपिया के आमदानी होइस।
समूह के महिला मन के बताती उमन बिहान योजना ले 15 हजार रुपिया अऊ सूक्ष्म ऋण योजना ले 60 हजार रुपिया पास कराए ले उमन ल मदद मिलीस। उमन एक ले जादा व्यवसाय के चयन करके उंकर समूह आर्थिक रूप ले मजबूत होए लगे हे अऊ 20 ले 30 हजार रुपिया के आर्थिक लाभ हर महीना कमावत हे।
