पान के सिरावत खेती ला नवा जिनगी, छुईखदान म पान अनुसंधान केन्द्र के स्थापना

खैरागढ़-छुईखदान-गंडई, जिला के विकासखण्ड छुईखदान म पहिली पान के खेती बड़का पैमाना म होवत रहिस, फेर तकनीकी जानकारी के कमी अउ जरूरी पौधा नइ मिले के सेती ए पुरखौती खेती धीरे-धीरे सिराय के कगार म पहुंच गे रहिस। पान के ए पारंपरिक फसल ला फेर जगाय बर राज्य सरकार ह बछर 2023-24 म विकासखण्ड छुईखदान म पान अनुसंधान केन्द्र बनाय के घोषणा करिस। ए केन्द्र ह रानी अवंती बाई लोधी कृषि महाविद्यालय छुईखदान म स्थापित करे गे हवय।
पान उपजइया किसान मन ला बढ़ावा देहे खातिर शेडनेट हाउस ढांचा बनाय बर 50 प्रतिशत सरकारी अनुदान देहे जात हे। अभी के बखत म 7 किसान मन ह हर एक झन 500 वर्गमीटर म शेडनेट हाउस बनाय हें, जेकर बर प्रति किसान 1.77 लाख रुपिया के मदद उद्यानिकी विभाग डहर ले देहे गे हवय। ए मन म ले 6 किसान अभी पान के खेती करत हें। ए कोसिस ले पान उपजइया किसान मन खराब मौसम म घलो सही माहौल म पान के खेती करके बने कमाई कर सकहीं।
जरूरी पौधा मन के उपलब्धता बनाय रखे बर कृषि महाविद्यालय के मदद ले जिला म बने सरकारी रोपणी कुकुरमुड़ा अउ बीरूटोला म घलो पान के खेती के प्रदर्शन प्लॉट तइयार करे जात हे।
जिला प्रशासन डहर ले ए खास कोसिस के सरलग देख-रेख करे जात हे। कलेक्टर अउ मुख्य कार्यपालन अधिकारी, जिला पंचायत ह बखत-बखत म जाके काम ला देखत हें अउ जरूरी गोठ-बात बतावत हें। संग मं, रानी अवंती बाई लोधी कृषि महाविद्यालय छुईखदान के जानकार मन किसान मन ला तकनीकी सलाह देवत हें, जेकर ले जिला म पान के खेती ला फेर जमा के किसान मन के आय ला बढ़ाय जा सकय।