-हर गुरुवार के स्त्रीरोग विशेषज्ञ ला मिलही सुविधा
दुर्ग 3 जुलाई 2020/पाटन ब्लॉक के सामुदायिक स्वास्थ्य केंद्र झीट म महिला मन के लिए विशेष साप्ताहिक क्लिनिक के आज शुभारंभ होइस । अब प्रत्येक गुरुवार के स्त्री रोग विशेषज्ञ इहा अपन सेवा देही । जनपद पंचायत पाटन के अध्यक्ष पाटन श्रीमती रामबाई सिन्हा अउ उपाध्यक्ष श्री देवेंद्र चंद्रवंशी द्वारा आज ये क्लिनिक के शुभारंभ होइस। कलेक्टर डॉ. सर्वेश्वर भूरे के निर्देश के बाद जीवन दीप समिति के माध्यम ले निजी चिकित्सक के व्यवस्था करे गे हावे । सीएमएचओ डॉ. जी एस ठाकुर हा बताइस कि सामुदायिक स्वास्थ्य केंद्र म डॉ. अहिल्या पटेल अपन सेवा देही । ये क्लिनिक ले अब हर आयु वर्ग के महिला मन ला लाभ होही । अब अपन गांव के पास गायनेकोलॉजिस्ट होये ले बहुत सुविधा मिलही पहली महिला मन ला रायपुर जाये ला पड़त रिहिस । खासकर गर्भवती स्त्री मन ला अब बढ़ सुविधा हो जाही । स्त्री रोग विशेषज्ञ के माध्यम ले प्रसव पूर्व जांच, गर्भावस्था म विशेष परामर्श ले गर्भवती के पोषण के स्थिति अउ गर्भस्थ शिशु के पोषण अउ विकास के मॉनिटरिंग म सहायता मिलही । किशोरी बालिका मन ला स्त्री रोग ले संबंधी सलाह, माहवारी स्वच्छता मन के महत्वपूर्ण विषय मन म सलाह मिलही । मुख्यमंत्री सुपोषण अभियान ले जुड़े माता मन ला घलव ये क्लिनिक के माध्यम ले अप्रत्यक्ष रूप म लाभ मिलही । बीएमओ डॉ. आशीष शर्मा हा बताइस कि सामुदायिक स्वास्थ्य केंद्र झीट के प्रभारी अधिकारी डॉ. कठोतिया सबो जरूरी सुविधा के इंतजाम करथे । उमन बताइस कि जल्दीच जिला प्रशासन द्वारा सोनोग्राफी के सुविधा ग्गलव उपलब्ध हो जही जेखर बर प्रस्ताव भेज दे गे हे । एखर बर डीएमएफ ले राशि उपलब्ध कराये गे हावे ।
दुर्ग ले गुरतुर गोठ बर सोनू कुमार