बलौदा बाजार के बेवफा चाय वाला के दुकान म बाढ़त हे भीड़

बलौदाबाजर, एमबीए चाय वाला के बाद अब बेवफा चाय वाला के चर्चा होवत हे। छत्तीसगढ़ के बलौदा बाजार म कमलेश धृतलहरे ह चाय के दुकान चलाथे वो ह अपन दुकान के नाव बेवफा चाय वाला रखे हे। जानबा हे के प्यार म धोखा खाए के बाद वो ह हार-थक के चाय के दुकान खोले हे। बताथें के येकर ये दुकान म प्रेमी जोड़ा अऊ प्यार म धोखा खाए मनखे मन बर चाय के अलग-अलग दाम रखे गए हे। प्रेमी जोड़ा मन बर चाय के दाम 15 रूपिया हे त प्यार म धोखा खाए मनखे मन बर 10 रूपिया हे।
बेवफा चाय वाला नाव के सेती ये दुकान के सोर अड़बड़ उड़त हे। खासकर जवान होवत लईका मन इहां टाई पास करे अऊ चाय चुहके बर सकलावत हें।ये दुकान के मालिक कमलेश एक झन नोनी संग प्‍यार करत रहिस, बेरोजगार होए के सेती वोकर प्रेमिका ह वोला छोड़ दीस। कमलेश ल प्रेमिका के छोड़ देहे के अड़बड़ दुख होईस। एकर बाद वो ह ये धंधा चालू करिस अऊ अपन विफल प्रेम कहानी ल मनखे मन ल जनवाय बर बेवफा चायवाला रखिस।