बलौदाबाजार जिला के एक महतारी ह अपन सिलाई के हुनर अउ सरकारी मदद ले परिवार के आधार बन गे हे। भगवती साहू बर ‘महतारी वंदन योजना’ ह ओखर सुग्घर गृहस्थी अउ मेहनत बर एक नवा सहारा बन के आय हे।
बलौदाबाजार, बलौदाबाजार विकासखंड के ग्राम पंचायत कोरदा म रहइया भगवती साहू आज ओ जम्मो महतारी मन बर प्रेरणा बन गे हें, जेमन मुस्किल समय म घलो अपन परिवार के सहारा बनना चाहथें। आज ओखर ए हुनर ला उड़ाए बर पाँख देहे के काम छत्तीसगढ़ सरकार के ‘महतारी वंदन योजना’ करत हे।
योजना के तहत हर महिना ओखर खाता म अवइया एक हजार रूपया ह ओखर काम बर संजीवनी बरोबर साबित होवत हे। ए पइसा के उपयोग ओमन सिलाई बर जरूरी कच्चा माल, जइसे धागा, सुई अउ काज-बटन बिसाए म करथे, जेखर ले ओखर काम ह बिना रुके चलत रहिथे।
भगवती साहू ह बताइस के ओखर घरवाला श्री रज्जन साहू ह किसान आय अउ कड़ा मेहनत करके खेती-किसानी ले परिवार ला पालथे-पोसथे। एक बड़े परिवार के जरूरत मन ला देखत ओमन तीन बछर पहिली सिलाई के काम अपन हाथ म लीन।
भगवती ह गदगद हो के कहिथे के एक समय रहिस जब छोटे-छोटे जरूरत बर ओमन ला सोचे बर परत रहिस, फेर अब सिलाई ले होवइया आय अउ सरकार के ए आर्थिक मदद ह ओखर जिनगी म आत्मसम्मान जगा देहे हे। सिलाई के काम ले मिलइया पइसा ले ओमन न केवल अपन घर के छोटे-बड़े जरूरत ला पूरा करत हें, बल्कि आर्थिक रूप ले मजबूत बन के अपन परिवार ला एक सुग्घर भविष्य कोती ले जावत हें। ओखर चेहरा के चमक अउ काम बर ओखर लगन ह ए साफ बताथे के महतारी वंदन योजना ह सिरिफ एक ठन आर्थिक मदद नो हे, बल्कि महतारी मन के सपना ला सच करे के एक बड़े माध्यम बन गे हे। कोरदा जइसे छोट कन गाँव म रह के भगवती आज अपन सिलाई के कला अउ आत्मनिर्भरता के दम म कामयाबी के नवा सीढ़ी चढ़त हे। ओमन महतारी वंदन योजना बर मुख्यमंत्री विष्णुदेव साय ला हिरदे ले धन्यबाद देहे हे।