भारत अंतरराष्ट्रीय व्यापार मेला म छत्तीसगढ़ पवेलियन के मुख्यमंत्री श्री भूपेश बघेल ह करिस उद्घाटन

रायपुर, नई दिल्ली के प्रगति मैदान म आयोजित 39वां भारत अंतरराष्ट्रीय व्यापार मेला (आईआईटीएफ) म छत्तीसगढ़ पवेलियन के मुख्यमंत्री श्री भूपेश बघेल ह आज उद्घाटन करिस। 14 ले 27 नवंबर तक चलइया ये मेला म छत्तीसगढ़ के कई ठन विभाग मन के स्टॉल लगाए गए हे। मेला गए मुख्यमंत्री श्री बघेल ह स्टाल मन के अवलोकन करके जानकारी लीन। मुख्यमंत्री ह छत्तीसगढ़ के कारीगर मन के प्रशंसा करत विजिटर बुक म घलोक उल्लेख करिन। उमन शुभकामना देवत लिखिन के छत्तीसगढ़ के स्टाल म हमार मेहनतकश कारीगर मन के उत्कृष्ट काम दिखाई देथे। ऊंखर कोति ले बने सामान विश्वस्तरीय हे।
ये मौका म कृषि मंत्री श्री रविंद्र चौबे अऊ खाद्य मंत्री श्री अमरजीत भगत घलोक उपस्थित रहिन। अंतरराष्ट्रीय व्यापार मेला के हॉल नम्बर 12-। छत्तीसगढ़ के पवेलियन हे, जऊन कि पहिलिच दिन इहां अवइया आगंतुक मन के आकर्षण के केंद्र रहिस। भारत अंतरराष्ट्रीय व्यापार मेला म छत्तीसगढ़ के पवेलियन के ये साल के थीम ‘ईज ऑफ डूइंग’ बिजनेस के जइसे तियार करे गए हे।
व्यापार मेला म बड़ संख्या म प्रदेश के दस्तकार, शिल्पकार, कारीगर हिस्सा लेवत हें। छत्तीसगढ़ के हस्तशिल्प अऊ हैंडलूम उत्पाद व्यापार मेला म बिक्री बर उपलब्‍ध हे।
जेमां बेलमेटल, ढोकरा शिल्प, कोसा सिल्क के लुगरा के स्टाल म भीड़ जुटत हे। इहां प्राकृतिक रंग ले तियार ड्रेस मटेरियल, बेडशीट, ग्राम उद्योग के हर्बल उत्पाद के खरीदारी करे जाथे।
व्यापार मेला म ये पइत 20 ले जादा देश हिस्सा लेवत हे। उन्‍हें 800 ले जादा कंपनी अऊ संस्था आए हे। ये मेला आम मनखे मन बर 19 नवंबर ले खुलही।