भारत पर्व 2026: लाल किला म छत्तीसगढ़ के सवाद अउ लोक परंपरा के तिहार

रायपुर, लाल किला के आगू लॉन अउ ज्ञान पथ म आयोजित भारत पर्व 2026 म छत्तीसगढ़ के सांस्कृतिक कार्यक्रम देखइया मन बर खास आकर्षण के केंद्र बन के उभरे हे। छै दिन के ये राष्ट्रीय सांस्कृतिक अउ पर्यटन महोत्सव म छत्तीसगढ़ के लोक संस्कृति, पारंपरिक कलेवा अउ पर्यटन पवेलियन ल देखे बर बड़का संख्या म लोगन मन पहुंचत हें। ये आयोजन गणतंत्र दिवस समारोह के अंतर्गत करे जात हे।
छत्तीसगढ़ के कलाकार मन कोति ले प्रस्तुत करे जात पंथी संग अउ दूसर पारंपरिक लोक नृत्य देखइया मन ल विशेष रूप ले आकर्षित करत हे। रंग-बिरंगा कपड़ा, जोशीला कदम अउ सशक्त आदिवासी ताल ले सजे प्रस्तुति ल देखे बर लोगन मन रुक-रुक के कार्यक्रम के आनंद लेवत हें अउ ताली बजाके कलाकार मन के उत्साह बढ़ावत हें।
छत्तीसगढ़ के फूड स्टॉल म घलो दिनभर बने भीड़ देखे ल मिलत हे। चीला, ठेठरी, खुरमी अउ फरा जइसे पारंपरिक कलेवा ल चिखे बर लोगन मन खास रुचि दिखावत हें। कई झन अवइया पहली पइत छत्तीसगढ़ी सवाद लेवत हें अउ एकर सादगी, सवाद अउ पौष्टिकता के बड़ाई करत हें।
उहें छत्तीसगढ़ पर्यटन पवेलियन ल घलो देखइया मन ले बढ़िया रिस्पॉन्स मिलत हे। पवेलियन के माध्यम ले राज्य के प्राकृतिक सुंदरता, समृद्ध आदिवासी संस्कृति, तिहार अउ खास पर्यटन स्थल मन के जानकारी देहे जात हे। एकर उद्देश्य देस-विदेस के घुमैया मन ल छत्तीसगढ़ के पर्यटन स्थल मन ले जोड़ना हे।
पर्यटक खास करके चित्रकोट जलप्रपात, बारनवापारा वन्यजीव अभयारण्य अउ सिरपुर जइसे प्राकृतिक अउ विरासत स्थल मन म गहिरा रुचि दिखावत हें। लोगन मन जाये-आये के रद्दा, ईको-टूरिज्म के संभावना अउ होमस्टे सुविधा मन के बारे म सक्रिय होके जानकारी लेवत हें।
एकर अलावा कर्तव्य पथ म गणतंत्र दिवस परेड म शामिल छत्तीसगढ़ के झांकी ल घलो भारत पर्व म प्रदर्शित करे गे हे, जेन देखैया मन के बीच खास आकर्षण के केंद्र बने हुए हे। देस के पहली डिजिटल जनजातीय संग्रहालय के सोच ऊपर आधारित ये झांकी अपन कलात्मक प्रस्तुति अउ सार्थक सदेस बर सराहे जात हे। बड़का संख्या म लोगन मन झांकी के संग फोटो खिंचवावत हें अउ छत्तीसगढ़ के इतिहास, आदिवासी विरासत अउ रहन-सहन के प्रभावशाली प्रदर्शन के बड़ाई करत हें।
31 जनवरी तक चलइया भारत पर्व 2026 देस के समृद्ध सांस्कृतिक विविधता के भव्य मंच बन के उभरे हे, जिहां अलग-अलग राज्य मन के लोक कला, पारंपरिक कपड़ा, हस्तशिल्प, संगीत अउ क्षेत्रीय पकवान एक संग देखे ल मिलत हे।