छत्तीसगढ़ के झांकी ल देखईया मन सहरईन
रायपुर, 31 जनवरी 2020। नई दिल्ली के लाल किला प्रांगण म भारत पर्व के आयोजन करे गीस। ये बेरा म छत्तीसगढ़ के लोक कलाकार मन ह छत्तीसगढ़ के पारम्परिक लोक गीत, नृत्य प्रस्तुत करके दर्शक मन के दिल जीत लीन। इहां के कलाकार मन ह कर्मा, ददरिया के संगें-संग देशभक्ति गीत के संग नृत्य प्रस्तुत करिन। आयोजन स्थल म छत्तीसगढ़ के झांकी ल देखके दर्शक मन ह खूबेच सहराइन। आयोजन म छत्तीसगढ़ के झांकी मनखे मन बर आकर्षण के केन्द्र रहिस।
छत्तीसगढ़ के वनांचल के लोक कलाकार मन ह मांदर के थाप म कदम ले कदम मिलाके लयबद्ध आकर्षक नृत्य प्रस्तुत करिन। कार्यक्रम म छत्तीसगढ़ के 16 कलाकार मन ह अपन प्रतिभा के प्रदर्शन करिन अऊ ताली बटोरिन। कलाकार मन ह गणेश वंदना, भारत माता वंदना घलोक प्रस्तुत करिन। आप जानतेच हव के नई दिल्ली के लाल किला प्रांगण म भारत पर्व के आयोजन केन्द्रीय पर्यटन मंत्रालय अउर आन मंत्रालय मन अऊ राज्य सरकार मन के सहयोग ले करे जात हे। भारत पर्व आयोजन के उद्देश्य देशवासी मन म देशभक्ति के भावना ल जगाना, देश के समृद्ध सांस्कृतिक विविधता ल देखाना अऊ ’’एक भारत श्रेष्ठ भारत’’ के भावना ल देखाना हे।
