मुख्यमंत्री ले भारत स्काउट्स अऊ गाइड्स छत्तीसगढ़ के प्रतिनिधिमंडल ह करिस मुलाकात

एक राखी सैनिक भाई मन के नाम अभियान के दीन जानकारी
रायपुर, मुख्यमंत्री श्री विष्णुदेव साय ले ऊंखर निवास कार्यालय म भारत स्काउट्स अऊ गाइड्स छत्तीसगढ़ (Bharat Scouts and Guides Chhattisgarh) के प्रतिनिधिमंडल ह सौजन्य मुलाकात करिन। प्रतिनिधिमंडल ह मुख्यमंत्री श्री साय ल भारत स्काउट्स अऊ गाइड्स छत्तीसगढ़ कोति ले प्रदेश भर म चलाए गे ‘एक राखी सैनिक भाई मन के नाम’ अभियान के जानकारी दीन।
मुख्यमंत्री ल प्रतिनिधिमंडल ह बताइस के भारत स्काउट्स अऊ गाइड्स छत्तीसगढ़ ह रक्षाबंधन के उपलक्ष्य म हमार देश के सीमा म तैनात सैनिक भाई मन के सम्मान म “एक राखी सैनिक भाई मन के नाम’ अभियान चलावत हे। ए अभियान के तहत छत्तीसगढ़ राज्य के सबो 33 जिला के बुलबुल, गाइड अऊ रेंजर बहिनी मन ह हाथ ले बने राखी सैनिक भाई मन बर सकेले हें। ये राखी मन हमार सैनिक भाइ मन ल भेजे जाही।
मुख्यमंत्री श्री साय ह भारत स्काउट्स अऊ गाइड्स छत्तीसगढ़ के अभियान ‘एक राखी सैनिक भाई मन के नाम’ के सराहना करत कहिन के ये बहुत खुशी के बात हे के ए अभियान के तहत छत्तीसगढ़ के लइका मन देश के रक्षा म सीमा म डटे जवान मन ल रक्षासूत्र भेजत हें। ए पहल ले लइका मन म देशभक्ति के भावना बाढ़ही अऊ हमार जवान मन ल घलोक भावनात्मक संबल मिलही । ए बेरा म भारत स्काउट्स अऊ गाइड्स छत्तीसगढ़ के राज्य मुख्य आयुक्त डॉ. सोमनाथ यादव, श्रीमती लक्ष्मी वर्मा, श्री मुरली शर्मा, श्री कैलाश सोनी, श्री समीर शेख संग आन गणमान्य जन उपस्थित रहिन।