- अभियान के शुरूआत सरगुजा संभाग के बलरामपुर जिला ले
- मुख्यमंत्री आज सामरी विधानसभा क्षेत्र के कुसमी, शंकरगढ़ अऊ बरिया गांव म पहुचिन
- ’भेंट-मुलाकात’ अभियान म सबो 90 विधानसभा क्षेत्र मन म जाही मुख्यमंत्री
- हर विधानसभा क्षेत्र के 3-3 गांव मन म जाही अऊ कोनो एक गांव म रतिहा थिराहीं
रायपुर, श्री भूपेश बघेल आज राजधानी रायपुर के पुलिस लाइंस हेलीपेड ले प्रदेश के सबो विधानसभा क्षेत्र मन म आमजनता, जनप्रतिनिधि अऊ समाज प्रमुख मन ले ’भेंट-मुलाकात’ के अभियान म रवाना होइन। मुख्यमंत्री ये अभियान के शुरूआत सरगुजा संभाग के बलरामपुर जिला ले करिन। श्री बघेल के पहिली पड़ाव सामरी विधानसभा क्षेत्र म होइस मुख्यमंत्री आज बलरामपुर जिला के सामरी विधानसभा क्षेत्र म कुसमी, शंकरगढ़ अऊ बरिया गांव म पहुचिन, रतिहा उमन राजपुर म थिराहीं।
मुख्यमंत्री श्री बघेल ह ’भेंट-मुलाकात’ के अभियान म रवाना होए ले पहिली मीडिया प्रतिनिधि मन ले चर्चा करत कहिन कि कोरोना के सेती एक लंबा अरसा ले मनखे मन के बीच जा नइ पाए रहेंव, हालांकि पउर साल सामाजिक संगठन मन के बैठक म सामिल होए के मौका मिले रहिस। भ्रमण के समय शासकीय योजना मन के धरातल म स्थिति के जानकारी लेहूं। उमन कहिन कि आम जनता ले अऊ जनप्रतिनिधि मन ले मिले ले योजना मन के बारे म जानकारी मिलही, का संशोधन होना चाही, का जुड़ना चाही, एखर जानकारी मिलही। भ्रमण के समय गांव मन म होए अच्छा काम मन के संग उहां के समस्या मन के बारे म घलोक जानकारी मिलही। मोर कोसिस होही के मैं जादा ले जादा समय मनखे मन के संग बितावं। उमन कहिन कि भ्रमण के समय ओ मन पीडीएस दुकान, पंचायत कार्यालय, आंगनबाड़ी, स्वास्थ्य केन्द्र, थाना, स्वामी आत्मानंद अंगरेजी माध्यम स्कूल, नगर पंचायत के दफ्तर जाबोन। उमन बताइन कि जिला के प्रभारी मंत्री अऊ क्षेत्र के विधायक घलोक भ्रमण के समय ऊंखर संग होहीं। नगरीय प्रशासन अऊ विकास मंत्री डॉ शिवकुमार डहरिया घलोक मुख्यमंत्री के संग रवाना होइन।
