रायपुर, मुख्यमंत्री श्री भूपेश बघेल अपन प्रदेशव्यापी भेंट-मुलाकात अभियान के अगला कड़ी म 12 अकटूबर के सक्ती जिला के जैजैपुर विधानसभा क्षेत्र म भेंट-मुलाकात बर जावत हें। ये बेरा म मुख्यमंत्री श्री बघेल जनता मन ले भेंट-मुलाकात करके शासन के योजना मन के क्रियान्वयन के जानकारी लेहीं। उहें आमजनता के समस्या मन उपर उंखर से सीधा गोठ-बात करहीं। जानबा हे कि भेंट-मुलाकात कार्यक्रम म आमजनता ल प्रदेश के मुखिया मेर सीधा बातचीत करे के अवसर मिलथे।
मुख्यमंत्री 12 अकटूबर के हेलीकाप्टर ले रायपुर पुलिस ग्राउंड हेलीपेड ले भिनसरहा 11.30 बजे सक्ती जिला के विकासखण्ड जैजैपुर के ग्राम कांशीगढ़ बर प्रस्थान करहीं। मुख्यमंत्री के उहां मंझन 12.30 बजे ले भेंट-मुलाकात कार्यक्रम चालू होही। फेर मंझनिया 2.10 बजे ग्राम कांशीगढ़ ले हेलीकाप्टर ले उड़ा के मंझनिया 2.25 बजे ग्राम छपोरा पहुंचहीं। मुख्यमंत्री के मालखरौदा विकासखण्ड के ग्राम छपोरा म मंझनिया 3.05 बजे भेंट-मुलाकात कार्यक्रम शुरू होही। मुख्यमंत्री श्री बघेल ग्राम छपोरा ले संझा 4.55 बजे प्रस्थान करके संझा 5.05 बजे जैजैपुर विकासखण्ड के हसौद पहुंचहीं। मुख्यमंत्री हसौद नगर म संझा 6.30 बजे ले प्रतिनिधि मण्डल ले भेंट करहीं। कार्यक्रम के बाद उहें रात थिरावन करहीं।
आप मन जानतेच हव कि मुख्यमंत्री श्री बघेल ह अपन प्रदेशव्यापी भेंट-मुलाकात अभियान के शुरूआत इही साल 4 मई ले करे रहिन। ये बेरा म मुख्यमंत्री सरगुजा संभाग के 16, बस्तर संभाग के 12, बिलासपुर संभाग अंतर्गत गौरेला-पेण्ड्रा-मरवाही जिला के एक विधानसभा अउ रायगढ़ जिला के 4 विधानसभा म भेंट-मुलाकात बर पहुंचे हें। अइसनहे दुर्ग संभाग के बालोद जिला के 3 विधानसभा अऊ कबीरधाम जिला अंतर्गत 2 विधानसभा मन म जनता के बीच भेंट-मुलाकात बर अब तक पहुंच गे हें। ये कड़ी ल आगू बढ़ात मुख्यमंत्री श्री बघेल 12 अकटूबर के बिलासपुर संभाग के नवगठित सक्ती जिला अंतर्गत जैजैपुर विधानसभा म भेंट-मुलाकात करहीं।
मुख्यमंत्री श्री भूपेश बघेल 12 अकटूबर के जैजैपुर विधानसभा क्षेत्र म करहीं भेंट-मुलाकात
