भेंट-मुलाकात : मुख्यमंत्री अऊ जनता के बीच संवेदनात्मक जुड़ाव के कड़ी

रायपुर, मुख्यमंत्री श्री भूपेश बघेल के भेंट-मुलाकात आज पूरा प्रदेश म चर्चा के विसय बन गए हे। ये अभियान म एक कोति जिहां मुख्यमंत्री खुदे गांव-गांव पहुंचके सरकार कोति ले जनहित म संचालित योजना मन के क्रियान्वयन के हकीकत देखत हें त दुसर कोति आम जनता ले उंकरे क्षेत्र म रूबरू होके उंखर समस्या घलोक सुन के समस्या मन के जल्दी निराकरण करत हें। इही कारण हे कि जनता उत्सुकता ले अपन क्षेत्र म मुख्यमंत्री के अगोरा करत हें। जनता भेंट-मुलाकात म मुख्यमंत्री के सभा म खुलके अपन बात रखत हें। मुख्यमंत्री अब तक 10 जिला मन म 19 विधानसभा क्षेत्र मन के दौरा करे हें, जेमे बस्तर के 12 अऊ सरगुजा के 7 विधानसभा क्षेत्र सामिल हे। भेंट-मुलाकात अब एक अभियान ले बढ़के मुख्यमंत्री अऊ जनता के बीच संवेदनात्मक जुड़ाव अऊ उम्मीद के साकार होए के कड़ी बन गए हे, जेन मनखे मन के जीवन म सकारात्मक बदलाव अऊ प्रदेश के विकास के जरूरत ल महसूस करत ओखर अनुकूल विकास कार्य मन ल दिशा देहे के सार्थक पहल बन गए हे।
सरगुजा अऊ बस्तर दुनों संभाग के विधानसभा म ज्यादातर क्षेत्र ग्रामीण अऊ सुदूर वनांचल के हे, जिहां शासकीय योजना मन के समीकरण के सच्चा परीक्षा होथे। ए जगा मन म मुख्यमंत्री श्री भूपेश बघेल जब भेंट-मुलाकात बर पहुंचिन त सरकार के योजना मन के आम जनजीवन म सीधा प्रभाव ल समझिन, परखिन अऊ ओखर दूसर पक्ष ल घलोक सुनिन। ये अभियान ले कई जिंदगी बदल गीस, कई मनखे मन के सादा जीवन म अब खुशहाली के रंग भर गे। सरगुजा संभाग के ग्राम दुर्गापुर के 58 साल के दुलारे राम पैकरा ल मुख्यमंत्री श्री बघेल ह मोटराइज्ड ट्राइसिकल दीस त ओकर चले-फिरे अऊ आए-जाए म होवइया तकलीफ दूर हो गे।
अइसनहे आरागाही म दृष्टिहीन लइका मन के मां श्रीमती अनति देवी के मांग म समुचित इलाज के बीड़ा सरकार ह उठाइस। सूरजपुर जिला के खोरमा निवासी सोमारू के इलाज बर तुरंते एक लाख रूपिया के आर्थिक सहायता पास करे गीस। बलरामपुर-रामानुजगंज जिला के तम्बेश्वरनगर म श्रीमती रीना विश्वास के बेटा के ब्रेन ट्यूमर के इलाज बर मुख्यमंत्री ह मौका म ही स्वेच्छानुदान मद ले 4 लाख रूपिया के आर्थिक सहायता घोषित कर दीन। बस्तर विधानसभा म आयोजित भेंट-मुलाकात म घलोक कई अइसे मामला आइस जेमां मुख्यमंत्री के निर्णय ल जम्‍मो झन सहराईन, ए जइसन भेंट-मुलाकात ह अब कई मनखे मन के ज़िंदगी म सुख के नवा अंजोर बगराए हे।
भेंट-मुलाकात म अइसन कई मौका आए हे जब जरूरतमंद मन के सहायता म मुख्यमंत्री कोति ले लेहे गए निर्णय ह मनखे मन के दिल जीत लीस। मुख्यमंत्री के संवेदनशीलता ह भेंट-मुलाकात अभियान ल जनजुड़ाव के आधार प्रदान करिस। अइसनहेच भावुक क्षण बलरामपुर जिला के ग्राम कुसमी म देखे ल मिलीस जिहां कांकेर क्षेत्र के झमित ह तीन साल पहिली होए बीमारी के चलते ओकर आवाज़ चल देहे रहिस, बिकट परिस्थिति के बाद घलोक वो ह अपन हिम्मत ले 12वीं म फर्स्ट डिवीजन आइस, कोदागांव भेंट-मुलाकात म जब मुख्यमंत्री ल झमित के परेशानी के बारे म पता चलिस त उमन झमित ल तुरंते 2 लाख रूपिया देहे के घोषणा करत मेडिकल सर्टिफिकेट घलोक बनाए के निर्देश दीन अऊ कहिन के “पइसा के सेती पढ़ई नइ रुकय।”
अइसनहेच आरागाही म सीमांकन के मांग करत रो डरे चन्द्रकान्ता ल मुख्यमंत्री ह अपन पास बुलाके बइठाइन, ओला अभिभावक के जइसे समझात चुप कराइन अऊ कलेक्टर ल एक हफ्ता के भीतर सीमांकन कराए के निर्देश दीन। मुख्यमंत्री ह दुर्गुकोंदल म बचपन ले दिव्यांग बहिनी प्रियंका दुग्गा अऊ प्रीति दुग्गा के इलाज बर हर सम्भव कदम उठाए अऊ बेहतर ले बेहतर इलाज कराए के निर्देश दीन। अइसनहेच बहुत अकन मामला अइसे आइस जिहां मुख्यमंत्री कोति ले लेहे गए निर्णय ह मनखे मन ल बड़ राहत दीस।
भेंट-मुलाकात अभियान म मुख्यमंत्री के सरलता अऊ लइका मन के प्रति ऊंखर प्रेम ह सबो ल आकर्षित करिस। अपन दौरा म ओ मन जिहां गीन, लइका मन ले मिलिन अऊ ऊंखर संग समय बिताइन। उमन रघुनाथनगर के स्‍वामी आत्मानंद इंग्लिश मीडियम स्कूल म लइका मन के संग गिल्ली-डंडा के आनंद उठाइन। पढ़ईया लईका मन अऊ युवा मन ल पारंपरिक खेल मन के प्रति प्रोत्साहित करिन। गोविंदपुर के आंगनबाड़ी म लइका मन ले मिलके बड़ मया भाव ले सबो लइका मन ल पिपि बांटिन। ग्राम बरियो म साक्षी बेग नाम के नोनी भिनसरहा ले ही मुख्यमंत्री के संग फ़ोटो खिंचाए बर बइठे रहिस, जे बात के जानकारी मिलतेच मुख्यमंत्री साक्षी तीर पहुंचिन, ओला दुलारिन अऊ संग म फ़ोटो घलोक खिंचवाईन।
कांकेर विधानसभा के बादल ग्राम के आंगनबाड़ी केंद्र म जब उमन एक बच्ची ल गोदी म उठाइन त वो ह मुख्यमंत्री के कालर पकड़ लीस, त मुख्यमंत्री ह ठहाका लगात कहिन कि “ए हर तो सीधा मुख्यमंत्री के ही कॉलर पकड़ लीस।” मुख्यमंत्री ह यात्रा के समय अलग-अलग गांव मन म लइका मन के संग गिल्ली-दंडा, भौरा, चाइनीज शतरंज जइसे गेम खेनि। उमन लइका मन ल शिक्षा के संगें-संग खेल मन के घलोक महत्व बताइन।
भेंट-मुलाकात अभियान म मुख्यमंत्री श्री भूपेश बघेल अऊ जनता के आत्मीय जुड़ाव देखतेच बनत रहिस। मुख्यमंत्री दौरा के बीच स्थानीय गांव वाले मन के घर म बने खाना खाइन। मुख्यमंत्री ह स्थानीय व्यजन मन के स्वाद चिखिन अऊ क्षेत्रीय प्रगति के सम्भावना मन उपर कई अहम निर्णय लीन जेखर से अब क्षेत्र म विकास अऊ निर्णय के नवा काम हो सकही। मुख्यमंत्री हर जगा पारंपरिक भोजन के स्वाद लीन अऊ परिवार के सदस्य मन ल उपहार भेंट करिन। बिहारपुर म ग्रामीण श्री भोपाल सिंह के घर ऊंखर संग पालथी मार के पंगत म बइठके पेहटा, तिलौरी, रोटी, चावल, दाल, रमकेरिया के भुजिया, करेला भुजिया, लकड़ा के चटनी के स्वाद लेत जेवन करिन। भेंट- अभियान के समय मुख्यमंत्री जिहां गीन उमन क्षेत्रीय व्यंजन के स्वाद लीन।