– सस्टनेबल डेवलपमेंट कैटेगरी म भिलाई अऊ भिलाई चरौदा अऊ देश म क्लीनेस्ट सिटी कैटेगरी म पाटन ह देश म पहिली स्थान लाके बनाइस कीर्तिमान
दुर्ग 21 अगस्त 2020। काली जारी होए स्वच्छता अवार्ड म दुर्ग जिला ह इतिहास रच देहे हे। सस्टनेबल डेवलपमेंट कैटेगरी म भिलाई अऊ भिलाई-चरौदा पुरस्कृत होए हे अऊ ईस्ट जोन क्लीनेस्ट सिटी कैटेगरी म पाटन ह स्थान बनाए हे। ए नगरीय निकाय मन म स्वच्छता ल लेके जऊन काम सरलग करे गीस, ओखर परिणामस्वरूप ये जगा मिले हे। कलेक्टर डाॅ. सर्वेश्वर नरेंद्र भुरे ह ए उपलब्धि म तीनों निकाय मन ल बधाई देहे हें।
भिलाई बेस्ट सेल्फ सस्टेनेबल सिटी –
स्वच्छता सर्वेक्षण म भिलाई शहर ल 3 ले 10 लाख वाले जनसंख्या के कैटेगरी म पूरा भारत म बेस्ट सेल्फ सस्टेनेबल सिटी के राष्ट्रीय अवार्ड/पुरस्कार प्राप्त होय हे। ये अवार्ड प्रधानमंत्री जी के स्वच्छ महोत्सव कार्यक्रम के तहत प्राप्त होय हे। कलेक्ट्रेट स्थित एनआईसी कक्ष म महापौर अऊ भिलाई नगर विधायक श्री देवेंद्र यादव, महापौर परिषद के सदस्य अऊ स्वच्छता प्रभारी श्री लक्ष्मीपति राजू अऊ आयुक्त श्री ऋतुराज रघुवंशी, नोडल अधिकारी स्वच्छ भारत मिशन तरुण पाल लहरें, स्वास्थ्य अधिकारी धर्मेंद्र मिश्रा ह ऑनलाइन बेस्ट सेल्फ सस्टेनेबल सिटी के अवार्ड काली प्राप्त करिन। स्वच्छता के मापदंड मन म खरा उतरे बर नगर पालिक निगम भिलाई के महापौर श्री देवेंद्र यादव अऊ आयुक्त श्री ऋतुराज रघुवंशी के कुशल मार्गदर्शन म स्वच्छता के निचले स्तर के कर्मचारी मन ले लेके सबो अधिकारी मन ह जबर मेहनत करे रहिन अऊ शहर के जागरूक जनता ह अवार्ड देवाए म महत्वपूर्ण भूमिका निभाए हे। निगम ह स्वच्छता के कई ठन मापदंड मन म विशेष रुप ले ध्यान देवत काम करे रहिस हे। निगम के महापौर श्री देवेंद्र यादव ह कहिन के भिलाई के जनता हमेशा स्वच्छता के प्रति जागरूक हे अऊ महत्वपूर्ण राष्ट्रीय पुरस्कार प्राप्त करे म अपन पूर्ण सहभागिता दिखाए हे, निगम के अधिकारी/कर्मचारी संग, एखर से जुड़े सबो मनखे मन ल अऊ शहर के जनता ल एखर बर बधाई देवत हंव।
कचरा मुक्त शहर मन के सूची म सामिल भिलाई ल मिल गे हे 3 स्टार रेटिंग-
कचरा मुक्त शहर मन म भिलाई नगर ह पहिलिच ले सामिल हो गए हे अऊ अब भिलाई ल 3 स्टार रेटिंग मिल गए हे। भिलाई शहर के जनता स्वच्छता के प्रति जागरूक हे तभे भिलाई ह कचरा मुक्त शहर म सामिल हो सके हे। स्वच्छ सर्वेक्षण के तहत निगम प्रशासन ह स्टार रेटिंग अऊ वाटर प्लस म विशेष ध्यान केन्द्रित करे रहिस। स्वच्छ सर्वेक्षण के महत्वपूर्ण पहलु मन म काम करे गीस। नाली मन म कचरा ल रोके बर अऊ सीधा जल स्रोत मन म कचरा झन मिलय एखर बर नाली मन म जाली लगाय के काम करे गीस अऊ जीवीपी पाइंट ल खतम कर सौंदर्यीकरण करे के काम करे गीस। एसएलआरएम सेंटर म कचरा मन के छंटनी, घना आबादी वाले क्षेत्र मन के सघन सफाई अउ डोर टू डोर कचरा कलेक्शन के अन्तर्गत सबो पैरामीटर ल ध्यान म रखत काम संपादित करे गीस।
ओडीएफ प्लस प्लस के दर्जा तको पाए हे भिलाई-
नगर पालिक निगम भिलाई ह खुला म शौच मुक्त के दर्जा पहिलिच ले पा गए हे अऊ ओडीएफ प्लस प्लस के दर्जा घलोक ए साल भिलाई निगम ह पाए हे, खुला म शौच मुक्त बनाए बर अधिकारी मन ह मुंधरहे ले ओडी वाले जगा मन म नजर रखे के काम करे रहिन हे, जुर्माना वसूली करे गीस, शौचालय ल अपडेट करे गीस नतीजा म भिलाई ल ओडीएफ प्लस प्लस के दर्जा मिलिस।
महापौर श्री देवेंद्र यादव अऊ आयुक्त श्री ऋतुराज रघुवंशी के नेतृत्व म सबो के अथक प्रयास ले निगम भिलाई ह पहली पइत स्वच्छ सर्वेक्षण के तहत ये राष्ट्रीय अवार्ड हासिल करे हे। ये मां बीएसपी प्रबंधन अऊ शहरवासी मन ह अहम भूमिका निभाए हें।
भिलाई चरौदा ह सस्टनेबल डेवलपमेंट कैटेगरी म ईस्ट जोन म दूसरा-
भिलाई चरौदा निगम सस्टनेबल डेवलपमेंट कैटेगरी म दूसर स्थान म रहिस। इहां कमिश्नर श्री कीर्तिमान राठौर ह बताइस के निकाय ह साल 2019 ले ही स्वच्छता के क्षेत्र म शानदार काम करत आए हे। एखर संगेच एहू महत्वपूर्ण तथ्य हे के स्थायी रूप ले स्वच्छता बर बनाये गए सबो मानदंड मन ऊपर ए निकाय के प्रदर्शन बेहतर रहे हे। उमन बताइस के डिस्पोजेबल कचरा के निष्पादन म ए निगम के काम अग्रणी हे। कुछ महीना पहिली भारत सरकार के सचिव महोदय ह घलोक इहां डिस्पोसेबल कचरा के निष्पादन देखे रहिन अउ निगम कोति ले होवत आन पहल ल घलोक देखे रहिन अऊ बिकट साहराये रहिन।