दुर्ग, सामूहिक जनाकारी के मामला म दुर्ग कोर्ट ह बिरसपत के बड़का फैसला सुनाइस। ए म तीन आरोपी मन ल आजीवन कारावास के सजा सुनाये गए हे। तीन आरोपी मन म दू आरोपी सुपेला थाना म पदस्थ बताए जात हे। जेमा पुलिस कांस्टेबिल सौरभ भक्ता अउ चंद्रप्रकाश पांडेय के नाम सामिल बताए जाट हे। तीसरइया आरोपी सुपेला सरकारी अस्पताल के डॉक्टर गौतम पंडित ये।
ये घटना पांच साल पहिली के आय, दुष्कर्म पीड़िता ह घटना के डेढ़ साल बाद, न्याय के उम्मीद छोड़के फांसी लगा लेहे रहिस। सुपेला के सरकारी अस्पताल म 18 जून 2014 के दिन देर रात इलाज कराए पहुंचे पीड़िता ल नाइट ड्यूटी म पदस्थ डॉक्टर गौतम पंडित ह मतौना सूजी लगाके जनाकारी के घटना ल अंजाम दे रहिस। ओ बेरा म अस्पताल ड्यूटी म पुलिस सौरभ भक्ता ह दुष्कर्म के घटना के वीडियो क्लिपिंग बनाए रहिस जेला इंटरनेट म वायरल करे के धमकी देके वो अऊ चंद्रप्रकाश पांडेय ह घलोक पीड़िता ले कई पइत दुष्कर्म करे रहिन।
पीड़िता के गर्भवती होए म भक्ता ह गर्भपात तको कराए रहिस ते कारन ओकर तबीयत बिगड़ गीस अउ परिवार ल जानकारी हो गीस। तेकर बाद रिपोर्ट लिखाय गीस तेमा, तीनों आरोपी मन के खिलाफ दुष्कर्म अउ आन मामला म अपराध पंजीबद्ध करके तीनों ल पकड़ के जेल भेज दे गए रहिस।