सोशल डिस्टेंस के पालन कराए आज बिहनिया ले जांच बर निकले रहिस निगम के टीम
दुर्ग 08 मई 2020। निगम भिलाई के जोन के अधिकारी मन आज भिनसरहा ले ही टीम बनाके दुकान मन म अउ सार्वजनिक जगा के जांच करिन। उमन सोशल डिस्टेंस के पालन नई करइया अउ नियम के उल्लंघन करइया कई मनखे मन ऊपर जुर्माना लगाइन। कोरोना वायरस के संक्रमण के रोकथाम बर घर ले बाहिर निकलइया सबो मनखे मन ल मास्क लगाना अउ सोशल डिस्टेंस के पालन करना अनिवार्य हे। जउन एकर पालन नई करत हें उंकर खिलाफ भिलाई निगम प्रशासन सख्त कार्यवाही करत हे। जोन 01 नेहरू नगर के दू दुकान के संचालक मन ह मास्क नइ लगाय रहिन त दूनो मेर ले एक-एक हजार रूपिया अर्थदंड वसूले गीस। जोन 04 मदर टेरेसा नगर म बिन मास्क लगाए 8 मनखे मन ले 2500 रूपिया अर्थदंड ले गीस।
निगम के सबो जोन के स्वास्थ्य अउ राजस्व विभाग के टीम सार्वजनिक स्थान म थूके अउ मास्क या आन उपाय ले चेहरा ल ढाँके बिना निकलइया मनखे ऊपर अर्थदंड के कार्यवाही करे गीस। निगम के टीम बाजार क्षेत्र, दुकान अउ ग्राहक मन के सरलग जांच करत हे अऊ नियम के उल्लंघन करइया ऊपर कार्यवाही करत हे। निगम के टीम कई जगा अउ मनखे मन के जादा आवागमन वाले चौंक चौराहा मन म दुपहिया वाहन अउ चार पहिया म जादा सवारी मिले म अर्थदंड के कार्यवाही करत हे। पाछू दू दिन के कार्यवाही म 24 मनखे मन ले 11700 रूपिया के अर्थदंड वसूली करे गीस। निगम प्रशासन ह आम जनता ल अपील तको करत हे के मुह म मास्क या आन कोनो जिनिस ले मुह ल ढांक के रखव ताकि कोरोना के संक्रमण ले बचाव हो सकय। जोन 01 म नेहरू नगर क्षेत्र म 05 मनखे मन ले 2900, जोन 03 मदरटेरेसा नगर क्षेत्र म 14 मनखे मन ले 3700, जोन 04 शिवाजी नगर क्षेत्र म 04 मनखे मन ले 500 रूपिया अर्थदंड के वसूली करे गीस। बिना मास्क लगाए अवइया जवईया, दू पहिया अउ चार पहिया वाहन म जादा सवारी अउ सार्वजनिक क्षेत्र म सोशल डिस्टेंस के उल्लंघन अउ थूकइया अउ बिना मास्क लगाए दुकानदार अउ ग्राहक पाए जाय म अब तक भिलाई निगम क्षेत्र म 1550 मनखे मन ले 4,10,540 रूपिया के अर्थदंड के कार्यवाही करे हे।
